काठमाडौं । करिब दुई महिनादेखि निरन्तरको लकडाउनका कारण समग्र अर्थतन्त्र संकटोन्मुख छ । लकडाउनका कारण आर्थिक गतिविधि ठप्प हुँदा उद्योग, व्यापार, व्यवसाय सिथिल बन्दै गएका छन् । रोजगारीका क्षेत्र प्रभावित भएका छन् । लाखौं श्रमजीवीसहित सरकारको राजस्वमा समेत नकारात्मक प्रभाव परेको छ ।
लकडाउनको बीचमा अर्थतन्त्रलाई चलायमान बनाउनु पर्ने चौतर्फी दबाबका बीच सरकारले करिब दुईसाता अधिदेखि ४४ प्रकारका उद्योग व्यवसाय सञ्चालन गर्न दिएको थियो । उद्योग, वाणिज्य तथा आपूर्ति मन्त्रालयको सिफारिसमा पुनः केही उद्योग सञ्चालन गर्न दिने तयारी गरिएको छ ।
उद्योग, वाणिज्य तथा आपूर्ति मन्त्री लेखराज भट्टले निर्यातजन्य उद्योग, स्टिल, सिमेन्टलगायत ठूला उद्योग सञ्चालन गर्ने दिने विषयमा छलफल भइरहेको बताए । ‘‘विकास निर्माणका काम पनि गर्नुपर्ने छ,’’ उनले भने, ‘‘त्यसैले ठूला उद्योग सञ्चालन कसरी गर्ने दिने भन्ने विषयमा छलफल भइरहेको छ ।’’ उद्योग सञ्चालन गर्न मोडालिटीमा छलफल भइरहेको उनले बताए । ‘‘ठूला उद्योग कसरी, कुन समयमा सञ्चालन गर्ने भन्ने विषयमा मोडालिटीमा छलफल गर्दैछौं,’’ उनले भने, ‘‘आज र भोलि नै त्यो मोडालिटी बनाएर निर्णयमा पुग्छौं ।’’