काठमाडौं । प्रधानमन्त्री केपी शर्मा ओलीले कोरोना सङ्क्रमणबाट मुलुक मुक्त नहुँदासम्म तलब नलिने घोषणा गरेका छन् । नयाँवर्षका अवसरमा देशवासीलाई सम्बोधन गर्दै प्रधानमन्त्री ओलीले कोरोना महामारी समाप्त नभएसम्म मैले आफ्नो पारिश्रमिक ‘कोभिड–१९, प्रधानमन्त्री राहत कोष’मा जम्मा गर्ने निर्णय गरेको बताएका छन् ।

“आवश्यक पर्दा ‘हुनेको गास काटेर, नहुनेलाई बचाउने’ त हाम्रो परम्परा पनि हो । मुलुकको कार्यकारी प्रमुखका हैसियतले कोरोना महामारी समाप्त नभएसम्म मैले आफ्नो पारिश्रमिक ‘कोभिड–१९, प्रधानमन्त्री राहत कोष’मा जम्मा गर्ने निर्णय गरेको छु,” उनले सन्देशमा भनेका छन् ।

उच्च ओहोदामा रहेका र जनप्रतिनिधिले पाउने सुविधामा कटौती गर्नसमेत सुझाव दिनुभएको बताउँदै प्रधानमन्त्री ओलीले ती सबै सुझावमा प्रधानमन्त्रीको ध्यान गएको बाएका छन् ।

“मैले पटकपटक भन्दै आएको छु, यो युद्ध सबैको बलियो एकतामा जितिने युद्ध हो । विश्वव्यापी यस संकटको समाधान विश्वव्यापी प्रयास, साझेदारी र सहयोगबाट मात्र सम्भव छ । देश भित्रको संकट व्यवस्थापनमा एकताबद्ध राष्ट्रिय प्रयास सर्वाेपरि रहनुपर्छ । मुलुक प्रगतिमा रहेको बेला हुने उपलब्धिको न्यायोचित वितरण र अप्ठ्यारोमा हुने क्षतिको सह–भारबहन हामी सबैले नै मिलेर गर्नुपर्छ,” प्रधानमन्त्रीको भनाइ छ । 

यस अवधिमा विश्व बैंकबाट कोरोना संक्रमण रोकथाम आपतकालीन सहयोगका लागि २९ मिलियन अमेरिकी डलर बराबरको सहायता सम्झौता भएको प्रधानमन्त्रीले बताएका छन् । विश्व बैंकसहित विभिन्न साझेदार संस्थाबाट यसैगरी विभिन्न शीर्षकमा १ हजार ५६३ मिलियन अमेरिकी डलर बराबरको रकमको व्यवस्था भएको पनि प्रधानमन्त्रीले बताएका छन् ।

प्रधानमन्त्रीले अनिकालमा घरभित्रका भाँडाहरू बज्न थाल्ने बताउँदै पार्टीभित्रको कलह र विपक्षीहरूको आरोपलाई नयाँ वर्षको बिहानीमा पनि कटाक्ष गर्न छाडेका छैनन् र 

यसलाई रडाको मच्चिएको ठान्नु भूल हुने उनको भनाइ छ । “मन आत्तिएको, भत्किएको बेला ‘गर्नेले गरेन कि’ भन्ने आशङ्का मनमा पैदा हुन सक्छ । गरेको पुगेन कि भन्ने लाग्न सक्छ । अझ छिटो, अझ राम्रो र तत्काल परिणाम आउने गरी काम गरिदिए हुन्थ्यो भन्ने लाग्न सक्छ । तर अन्यौल र भ्रममा पर्ने या विचलित हुने होइन, मन बलियो बनाउनु आवश्यक हुन्छ,” प्रधानमन्त्री ओलीले भनेका छन् ।

विश्वका विभिन्न मुलुकहरूमा कोरोना भाइरसबाट संक्रमित हुनेको संख्या र यसको अनुपात फरक फरक रहेको उल्लेख गर्दै मुलुकमा संक्रमितको संख्या प्रति १० लाखमा ०.३ मात्रै रहेको भन्दै सन्तोष व्यक्त गरेका छन् ।

अहिलेसम्म संक्रमितको अवस्था सामान्य रहनु र कसैको पनि मृत्यु नहुनुलाई सरकारका प्रयासको सफलताको रुपमा चित्रण गरेका छन् ।