जनकपुर । धनुषाको रघुनाथपुर निवासी सोनेलाल पुलामीको हत्या अभियोगमा पक्राउ परेका पाँचैजनालाई जिल्ला अदालत धनुषाले मुद्दा पुर्पक्षका लागि थुनामा पठाउने आदेश गरेको छ ।
गत फागुन १६ गते सबैला नगरपालिका १२, रघुनाथपुरमा पुलामीलाई मादक पदार्थ सेवनगरी मातेका विभिन्न आठ जनाको समूहले सामुहिक आक्रमणगरी हत्या गरेको थियो । उनको हत्या अभियोगमा घटनाको केही घण्टाभित्रै पाँच जना पक्राउ परेका थिए ।
पक्राउ पर्नेहरुमा सबैला ४, पटेर्वाका सोनु मोनु भन्ने अमित कुमार यादव, सबैला १ का जितेन्द्र राउत, अशेष यादव, कपिल सदा र धर्मदेव भन्ने धर्मदेही राउत छन् । घटनामा संलग्न अन्य तीन जना अमरजित राउत, रोहित गोसाइँ र परिक्षण कुमार यादव फरार छन् ।
मंगलबार जिल्ला अदालतमा मुद्दा पेश भएकोमा बुधबार न्यायाधीस राजेश कटुवालको ७ नम्बर इजलासमा बहस भएको थियो । उक्त इजलासले तत्काल पक्राउ पर्ने पाँचै जनालाई मुद्दा पुर्पक्षका लागि थुनामा पठाउने र अन्य फरार अभिुक्तहरुलाई पक्राउ गरी अदालतमा पेश गर्न आदेश दिएको हो । अदालतले उनीहरुलाई बुधबारै सिन्धुली जिल्ला कारागारमा पठाएको हो ।
मुलुकी फौजदारी कार्यविधि संहिता २०७४ को दफा ६७ अनुसार उनीहरुलाई मुद्दा पुर्पक्षका लागि थुनामा पठाइएको अदालतस्रोतले जनाएको छ । जाहेरवाला मृतकका छोरा कालु भन्ने सुर्यनारायण पुलामीको पक्षबाट अधिवक्ताद्वय मुकेश कार्की र हेमबहादुर कार्कीले बहस गरेका थिए भने प्रतिवादी अमित र अशेषको तर्फबाट अधिवक्ता राधाकान्त झा तथा जितेन्द्रको तर्फबाट अधिवक्ता पारस मिश्राले बहस गरेका थिए ।
कोरोनाभाइरस (कोभिड १९) को विश्वव्यापी महामारीले मुलुक लकडाउन भइरहेको अवस्थामा बुधबार अन्तिम पेशीको रुपमा उक्त मुद्दामा बहस भएको अदालतले जनाएको छ । उक्त बहस सकिए लगत्तै नेपाल सरकारले जारी गरेको लकडाउन अवधिसम्म अर्को कुनै मुद्दामा बहस पैरवी नहुने अदालतका एक कर्मचारीले जानकारी दिए ।
