भाइले दाइलाई भने, ‘जय नेपाल सर’

भाइले दाइलाई भने, ‘जय नेपाल सर’

काठमाडौं । सरकारले मंगलबार २७औं प्रहरी महानिरीक्षक (आईजीपी) मा ठाकुरप्रसाद ज्ञवालीलाई नियुक्त गर्‍यो ।

ज्ञवालीले मंगलबारदेखि नै बधाई थाप्न सुरु गरे । गृह मन्त्रालयमा बुधबार बिहान दर्ज्यानी चिह्न ग्रहण गरेपछि आईजीपी प्रहरी मुख्यालयतर्फ पदभार ग्रहणका लागि प्रस्थान गरे ।

गृहबाट सीधै मुख्यालय पुगेका नवनियुक्त आईजीपीलाई स्वागतका लागि अतिरिक्त महानिरीक्षक (एआईजी) डा. आशा सिंह, डीआइजीहरू, एसएसपीलगायतका उच्च अधिकृत लामबद्ध थिए । स्वागतकै लाइनमा थिए, एसएसपी श्याम ज्ञवाली पनि ।

सबैले आईजीपी ज्ञवालीलाई ‘जय नेपाल सर’ भन्दै अभिवादन गर्न थाले । उनले पनि उसै गरी फर्काए । सबैलाई जय नेपालको अभिवादन फर्काउँदै गर्दा हातमा माला लिएर लाइनमा बसेका एसएसपी श्याम ज्ञवालीले पनि तनक्क तन्कँदै भने– ‘सर जय नेपाल’ अनि दुवै मुस्कुराए । नवनियुक्त आईजीपी ठाकुरप्रसाद ज्ञवाली र एसएसपी श्याम ज्ञवाली सहोदर दाजुभाइ हुन् । 

“प्रहरी संगठनमा अन्य क्षेत्रभन्दा कडा नियम हुन्छ, सिनियरको आदेश पालना गर्नैपर्ने हुन्छ,” एसएसपी श्यामले बाह्रखरीसँग भने, “अहिले भने बाल्यकालमा आफूलाई हुर्काएको दाइलाई आईजीपीका रूपमा स्वागत गर्न पाउँदा भावुक भएँ । बाल्यकालका ती दिन सम्झिएँ । आमाबुबालाई पनि सम्झिएँ । गौरवको अनुभूति हुँदो रहेछ ।”

सानैदेखि अभिभावकजस्तै गरी दाइले आफूलाई हुर्काएको भन्दै श्याम केही बेर ‘नोस्टाल्जिक’ बने । आफ्नै परिवारको सदस्य आईजीपी हुँदा आफूलाई थप जिम्मेवार बोध बनाएको श्यामको अनुभव छ ।

पारिवारिक र सांगठनिक सम्बन्ध भने फरक हुने श्यामको बुझाइ छ । अहिले श्याम महानगरीय प्रहरी आयुक्तको कार्यालय रानीपोखरीमा कार्यरत छन् । प्रहरी निरीक्षक (इन्स्पेक्टर) बाट सेवा प्रवेश गरेका उनी पनि भावी आईजीपीका दाबेदारमध्ये एक हुन् । 

विशेष अवस्था नआए प्रहरी निरीक्षकको सेवा प्रवेशबाटै आईजीपी हुने प्रावधान छ । ज्ञवालीका चार दाजुभाइमध्ये ठाकुर र श्याम प्रहरी सेवामा छन् । ३० वर्षे सेवा अवधिका कारण नवनियुक्त आईजीपीको कार्यकाल आगामी असारमै अर्थात् ५ महिनामै सकिनेछ । दर्ज्यानी चिह्न ग्रहणपछि आईजीपी ज्ञवालीले कानुन कार्यान्वयन र प्रहरीलाई जनताप्रति उत्तरदायी बनाउन आफ्नो भूमिका हुने बताएका छन् । 
 

केशवराज जोशी

प्रतिकृया दिनुहोस
ad