काठमाडौं । अपार्टमेन्ट व्यवसाय सम्बन्धी एउटा ठगी अभियोगमा बिहीबार पक्राउ परेका व्यवसायी रुपज्योती कंसाकारलाई तीन दिनको म्याद थप भएको छ ।
काठमाडौं जिल्ला अदालतले पक्राउ भएको मितिबाट लागु हुने गरी तीन दिन म्याद थप गरेको हो । काठमाडौं जिल्ला अदालतका श्रेष्तेदार आनन्द श्रेष्ठका अनुसार रुपज्योती र उनकी छोरी सुरुचीलाई तीन दिनको म्याद थप गरिएको हो ।
प्रहरले भने पाँच दिनको म्याद माग गरेको थियो । प्रहरीले बिहिबार बेलुका विमानस्थलबाटै रुपज्योतीलाई पक्राउ गरेको थियो । त्यस्तै छोरी सुरुचीलाई पनि प्रहरीले बिहीबार राति नै नियन्त्रणमा लिएको थियो ।
पूर्वअर्थ सहायक मन्त्रीसमेत रहेका उनी प्रतिष्ठित व्यापारिक घराना ज्योती ग्रुपका सदस्यसमेत हुन् ।
अपार्टमेन्ट व्यवसाय सम्बन्धी एउटा ठगी मुद्दामा पूर्वअर्थ सहायक मन्त्रीसमेत रहेका रुपज्योतिलाई काठमाडौं जिल्ला अदालतले २०७५ मंसिर २० गते पक्राउ गर्न आदेश दिएको थियो । त्यसपछि उनी काठमाडौं जिल्ला अदालतको आदेशविरुद्ध सर्वोच्च अदालत गएका थिए ।
तर प्रधानन्यायाधीश चोलेन्द्र शमशेर राणा र न्यायाधीश प्रकाश ढुंगानाको संयुक्त इजलासले रूपज्योतिको निषेधाज्ञासम्बन्धी रिट खारेज गरेपछि उनी प्रहरीको खोजी सूचीमा थिए।