गत साताको सबैभन्दा चर्चित रह्यो – चिनियाँ ह्याकरले नेपालमा आएर बैंकका एटीएमबाट पैसा चोरेको समाचार । सो समाचार नसेलाउँदै काठमाडौं र पोखरामा पनि डेंगीको प्रकोप फैलिएको समाचारले नेपाली दैनिक पत्रिकामा कब्जा जमाए भने साताको अन्त्यमा प्रधानमन्त्री केपी ओली सिंगापुरबाट उपचार गराएर फर्केको तथा ओली र अर्का अध्यक्षबीचको रस्साकस्सीको समाचारले स्थान पाए ।
चीनबाट नेपालको एटीएम ह्याक गर्ने योजनासहित आएको एक समूहले शनिवारको दिन नेपालका कार्यालय बन्द हुने र कसैले खासै मतलब नराख्ने अनुमान गरेर एकै दिनमा सकेजति धेरै रकम निकालेर आइतवारनै देश छाडेर जाने प्रपंच गरे । उनीहरूले एटीएम मेसिनमा कसैले कार्ड छिराएपछि सुरक्षा जाँच गर्ने एउटा प्रणालीलाई ह्याक गरेर आफ्नो उद्देश्य पूरा गरेका थिए । तर, समयमै प्रहरीलाई जानकारी गराउन केही बैंकहरू सफल भएका कारणले उनीहरूको उद्देश्य सफल हुन सकेन । नेपाल प्रहरीले एटीएमबाट पैसा निकाल्दै गरेका एक चिनियाँ नागरिकलाई पक्राउ गरेसँगै सो गिरोहका अन्य चारजनालाई पनि होटलबाट पक्राउ गरेर एटीएम ठगीको जालो च्यात्ने कार्य ग¥यो ।
एटीएमबाट कसरी नाटकीयरूपमा चिनियाँहरूले पैसा निकाले भन्ने तरिका बुझाउन नयाँ पत्रिकाको ग्राफिक्स सबैभन्दा सफल देखियो । कान्तिपुर तथा अन्नपूर्ण पोस्टले पनि ग्राफिक्सको माध्यमबाट रकम निकाल्ने प्रविधिको विषयमा जनतालाई बुझाउने प्रयास गरेका छन् । नागरिक, राजधानी, हिमालय टाइम्स र गोरखापत्रले पनि सो समाचारलाई गत साताको सोमवारको अंकमा महत्त्वका साथ प्रकाशित गरे । यी चिनियाँ ह्याकरबाट प्रहरीले एक करोड २६ लाख रुपैयाँ बरामद गरेको थियो । उनीहरूले शनिवार ५ घन्टामा १५ सयपल्ट कार्ड प्रयोग गरेर नबिल, नेपाल एसबीआई र नेपाल इन्भेस्टमेन्ट बैंकका एटीएमबाट सो रकम निकालेको कान्तिपुरको समाचारमा उल्लेख गरिएको छ । सोही दिन उही शैलीमा नेपालका बैंकको पैसा भारतका एटीएमबाट पनि करिब एक करोड भारु निकालिएको समाचार नयाँ पत्रिकाले प्रकाशित गरेको छ ।
मंगलवारको नयाँ पत्रिकाले कुन बैंकबाट कति रकम निकालियो भन्ने विवरण पनि प्रकाशित गरेको छ । सो पत्रिकाका अनुसार प्रभु बैंकको २ करोड ४३ लाख, ग्लोबल आइएमईको ३८ लाख, सनराइज बैंकको २४ लाख तथा एनआईसी एसियाको १७ लाख रुपियाँ ह्याकरले निकालेका छन् । ती ह्याकरको कामले चीनलाई लज्जाबोध भएको पनि नेपालस्थित चिनियाँ राजदूतावासले विज्ञप्ति निकालेर बताएको छ । मंगलवार हिमालय टाइम्स तथा राजधानीले ह्याकरले निकालेको पैसा अनधिकृत रुपमा साटिदिएको आरोपमा तीन नेपालीलाई पनि गिरफ्तार गरिएको समाचार प्रकाशित गरेका छन् । एटीएम लुट प्रकरणमा भारतीय रिजर्भ बैंकले चासो देखाएको समाचारलाई नागरिक दैनिकले मंगलवारको अंकमा छापेको छ ।
कम्प्युटर ह्याकिंगको समाचारकै क्रममा बुधबारको नयाँ पत्रिकाले नेपाल प्रहरीकै कम्प्युटर प्रणाली ह्याक भएको समाचार प्रकाशित गरेको छ । सो दैनिकलाई पूर्व डिआईजी हेमन्त मल्लले बताएअनुसार नेपाल प्रहरीको राष्ट्रिय प्रहरी प्रशिक्षण प्रतिष्ठानले प्रहरीका लागि तयार गरेको तालिम सामग्रीनै ह्याक भएको छ ।
यसै विषयमा गोरखापत्रले ई–बैंकिङ सेवामा चुनौती भएको विषयमा मुख्य समाचार बनाउँदै “अनौठा र अपत्यारिला चोरी बढ्दै” गएको बताएको छ ।
डेंगीको प्रकोपः मन्त्री संक्रमित
गत साता डेंगीको विषयमा समाचारलाई महत्त्व दिने पत्रिकामा नागरिक अगाडि रह्यो । मंगलवार नागरिकले पोखरामा डेंगी नियन्त्रणबाहिर गएको समाचारलाई एन्कर बनायो । समाचारअनुसार पोखराका ३३ मध्ये २७ वडामा डेंगी फैलिएको छ । सो समाचार प्रकाशित हुनु एक दिन अघिसम्म पोखरामा चार सय ३९ जनामा डेंगीको लक्षण देखिएको थियो र त्यसमध्ये पनि बसपार्क रहेको वडा नंबर ९ र सँगैको ८ वडा वासीमा संक्रमण बढी देखिएको थियो । कुल संक्रमणको ६० प्रतिशत बिरामी यिनै दुई वडाबाट आएको पनि सो समाचारमा जनाइएको छ ।
नागरिकले बुधबारको दिन डेंगीको समाचारलाई मुख्य बनाउँदै देशभर ४२ जिल्लामा फैलिएको सो रोग पाँच जिल्लामा भने प्रकोपकै रूपमा देखिएको लेखेको छ । पवित्रा सुनारद्वारा प्रेषित समाचारअनुसार प्रदेश १ का सुनसरी र झापा, प्रदेश ३ का मकवानपुर तथा चितवन र गण्डकी प्रदेशको कास्कीमा यो रोगले प्रकोपको रूप लिएको छ । सोही दिनको नागरिकमा डेंगी काठमाडौंका लागि एटम बम हुनसक्ने चेतावनी दिँदै डा. शेरबहादुर पुनको लेख पृष्ठ ४ मा प्रकाशित गरिएको छ । नागरिकमा पत्रकार सुनारकै समाचार “थप दुई महिना डेंगी संक्रमणको जोखिम” मुख्य समाचारका रूपमा प्रकाशित भयो । यो रोगको विषयमा ग्राफिक्स बनाउँदै नागरिकले ज्वरो आउने, शरिरमा रातो डाम देखापर्ने, आँखा दुख्ने, पेट दुख्ने, बान्ता हुने, पखाला लाग्ने, टाउको दुख्ने र शरीर कटकटी दुख्ने लक्षणहरू देखिने बताएको छ ।
कृषि तथा पशुपन्छी विकास मन्त्री चक्रपाणि खनाललाई डेंगी लागेको शंकामा अस्पतालमा भर्ना गरिएपछि दैनिक पत्रिकाले यस विषयलाई अझ महत्त्वका साथ प्रकाशित गरे । अन्नपूर्ण पोस्टले “कृषिमन्त्रीलाई डेंगी” शीर्षकमा समाचार प्रकाशित गरेको छ । सोही समाचारलाई नागरिक तथा राजधानीले पनि प्रकाशित गरेका छन् । राजधानीले काठमाडौं डेंगीका लागि उच्च जोखिममा भएको विषयलाई मुख्य समाचार बनाएको छ ।