काठमाडौं । राष्ट्रपतिले दिएको समयसीमा भित्र सहमतिको सरकार बन्न नसके पनि नेकपा एमालेले नेकपा माओवादीका अध्यक्ष पुष्पकमल दाहाल विरुद्ध उमेदबार अघि सार्ने भएको छ ।

तर एमालेका अध्यक्ष एवम् प्रधानमन्त्री केपी शर्मा ओली भने प्रचण्डसँग प्रतिष्पर्धा नगर्ने भएका छन् ।

उनी नउठेपछि प्रचण्डसँग प्रतिष्पर्धा गराउने व्यक्तिको पार्टीमा आन्तरिक रूपमा खोजी भएको स्रोतले जानकारी दियो । राष्ट्रपतिले दिएको समयसिमा सकिन २ दिन बाँकी हुँदासम्म दलहरुबीच छलफल नभएपछि एमालेले पनि प्रधानमन्त्रीको उमेदवार अघि सार्ने सचिव योगेश भट्टराईले जानकारी दिए । भट्टराईले भने, “सहमतिय सरकार गठन गर्न राष्ट्रपतिले दिनुभएको समय अझै २ दिन बाँकी छ । हेरौं यो बीचमा सहमति भयो भने ठिक छ नत्र भने एमालेले पनि प्रधानमन्त्रीमा  उम्मेदवारी दिन्छ ।” 

सहमतीय सरकारको पहल एमालेले नभई नेकपा माओवादी केन्द्र र नेपाली कांग्रेसले गर्नुपर्ने भट्टराईको भनाई छ । एमालेले प्रधानमन्त्रीको उमेदवारी दिने भए पनि अहिले नै उमेदबारको टुङ्गो भने नलगाएको उनले बताए । 

एमाले कार्यालय सचिव कृष्ण गोपाल श्रेष्ठले पनि सहमतिको सरकार नबन्ने भन्दै एमालेले प्रधानमन्त्रीको निर्वाचनमा एक जना उमेदवार खडा गर्ने बताए । उनले भने,“एमालेबाट मात्र हुन्छ वा सत्तारुढ गठबन्धनबाट हुन्छ । त्यो टुङ्गो लागिसकेको छैन । तर एमालेले प्रधानमन्त्रीको निर्वाचनमा भाग लिन्छ ।”

यसअघि नै कांग्रेसले तीन दलीय राष्ट्रिय सहमतिको सरकार गठन हुन नसक्ने बताइसकेको छ । 

राष्ट्रपति विद्या भण्डारीले सहमतीय सरकार निर्माणका लागि दिएको ७ दिनको समयसीमा सकिन २ दिन बाँकी हुँदा पनि दलहरुबीच एक पटक समेत राष्ट्रिय सरकार गठनका लागि छलफल हुन सकेको छैन ।