काठाडमौं । राजधानीका साँघुरा सडक फराकिलो बनाउन भन्दै तत्कालीन बाबुराम भट्टराई नेतृत्वको सरकारले उपत्यकाभित्र सडक मिचेर बनाएका घरटहरा भत्कायो । सडक फराकिला भए अनि काठमाडौं उपत्यकाको स्वरूप पनि फेरियो । 

खुला सडकमा बिना ट्राफिक जाम सवारी कुदाउन पाइने भयो अनि सडक पेटीमा पनि सजिलोसँग हिँड्न पाइने भयो भनेर जनता खुसी भए । तर, जिम्मेवार निकायको गैरजिम्मेवारीका कारण यात्रु तथा सवारी चालकले सहजताका साथ यात्रा गर्न पाएका छैनन् । राजधानीमा फराकिलो भएको कतिपय सडक दायाँ–बायाँ पार्किङका लागि प्रयोग भइरहेको छ भने फुटपाथ पनि पार्किङकै लागि प्रयोग भएका कारण यात्रुले राम्रोसँग प्रयोग गर्न पाएका छैनन् । विशेषगरी बागबजार, मैतिदेवी, बौद्ध, पुरानो बानेश्वर, कमलपोखरी, न्युरोडलगायत क्षेत्रमा सडककै छेउमा चार पांग्रे तथा दुई पांग्रे सवारीसाधन पार्किङ गरेको देख्न सकिन्छ ।

महानगरीय ट्राफिक प्रहरी महाशाखाका अनुसार काठमाडौं उपत्यकाभर २३ स्थानमा मात्र सडक छेउमा पार्किङ गर्न सकिन्छ । काठमाडौं महानगरपालिकाले पनि २३ स्थानमा मात्र सडक पार्किङको स्थान तोकेको छ ।

तर, राजधानीका मुख्य व्यापारिक स्थानहरूमा सवारीसाधन पार्किङ नगरेको सडक भेट्न गाह्रो पर्छ । “महानगरले व्यवसाय गर्न ठाउँ दिन्छ, पार्किङका बारेमा सोच्दैन । सडक पार्किङमा महानगरपालिकाले ध्यान दिँदैन, अनि दोषजति ट्राफिकलाई,” ट्राफिक प्रहरीहरू गुनासो गर्छन् । 

ट्राफिक प्रमुख डीआईजी प्रकाश अर्याल सडक पार्किङ व्यवस्थापनमा आफूहरू लागिपरेको बताउँछन् । “कतिपय कुरा चाहेर पनि गर्न सकिरहेका छैनौं । आवश्यक स्रोतसाधन छैन, सडक फराकिला बनेका छन् तर सडकमै पार्किङ गर्नेहरुको जमात ठूलो छ,” अर्यालले भने । 

महाशाखाका डीएसपी सविन प्रधानले पनि व्यवसाय गर्नेले पार्किङ स्थल सडकलाई ठान्दा समस्या हुने बताउँछन् । “व्यवसाय गर्नेले सवारी पार्किङको पनि व्यवस्था गरिदिनुपर्छ,” उनले भने । काठमाडौंका बागबजार, कमलपोखरी, पुरानो बानेश्वर, बौद्ध, महाराजगन्ज, कंलकीलगायत क्षेत्रका सडक किनारमा सवारी पार्किङ गर्न नमिल्ने महाशाखाले जनाएको छ । व्यापारिक केन्द्र न्युरोडमा दुई लाइनमात्र पार्किङ गर्ने महानगरले अनुमति दिए पनि लगभग पूरै सडक पार्किङले भरिएको हुन्छ । 

काठमाडौं महानगरपालिकाका नगर प्रहरी प्रमुख धनपति सापकोटा भने पार्किङमा सुधार आएको दाबी गर्छन् । “सडक पार्किङलाई व्यवस्थित गर्न हामी दैनिक खटिने गरेका छौं,  पहिलाको भन्दा सुधार छ,” सापकोटाले भने । 

हरेक दिन महानगरले सडक किनारमा पार्किङ गरेका सवारीसाधन उठाएर लैजान्छ । सवारी छुटाउन सवारीधनीले एक हजार रुपैयाँ जरिवाना तिर्नुपर्छ । तर, यसले पनि सडक किनारमा पार्किङ गर्ने प्रवृत्ति घट्नुको सट्टा बढिरहेको छ ।