काठमाडौं । नेपाली कांग्रेसको संस्थापन पक्षले नेता रामचन्द्र पौडेल पक्षलाई गुटगत धारणाले ग्रसित भएर प्रस्तुत नहुन आग्रह गरेको छ । बिहीबार बसेको केन्द्रीय कार्यसमिति बैठकमा संस्थापन पक्षीय केन्द्रीय सदस्यहरुले पौडेल पक्षलाई गुटगत धारणाबाट ग्रसित भएर प्रस्तुत नहुन आग्रह गरेका हुन् ।  

केन्द्रीय कार्यसमितिको बैठकमा जारी चुनावी समीक्षा आ–आफ्नो धारणा राख्दै संस्थापन पक्षका नेताहरुले वक्तव्यबाजी गरेर कांग्रेस बलियो नहुने बताए । ‘‘बिहीबारको बैठकमा बोल्ने केन्द्रीय सदस्यहरु पार्टीमा पछिल्लो समयमा मौलाएको गुटबन्दी र वक्तव्यबाजीले कांग्रेस बलियो नहुने भन्दै सभापतिको बचाउमा उत्रिनुभयो,’’ एक केन्द्रीय सदस्यले भने । 

संस्थापन पक्षीय केन्द्रीय सदस्यहरुले वरिष्ठ नेता रामचन्द्र पौडेल र पूर्वमहामन्त्री प्रकाशमान सिँहले सभापति शेरबहादुर देउवालाई बुझाएको लिखित पत्रलाई बेमौसमी बाजाको संज्ञासमेत दिएका छन् । वरिष्ठ नेता पौडेलले केही साता अघि र सिँहले चैत ९ गते सभापति देउवालाई चुनावी हारको कारण बारे लिखित धारणा बुझाएका थिए । 

‘‘सभापतिज्यूलाई बुझाइएका पत्रहरु निराशा, कुण्ठा र गुटगत धारणाले ग्रसित छ । यीे बेमौसमी बाजा जस्तै छन्’’, सभापति देउवाका विश्वासपात्र मध्येका एक केन्द्रीय सदस्य ज्ञानेन्द्रबहादुर कार्कीले बैठकमा भने, “वक्तव्यबाजी गरेर नेपाली कांग्रेस बन्दैन । एकता र प्रतिवद्धताका साथ जाउँ, जनता हामीसँगै छन् । जनमत घटेको छैन् ।’’

त्यस्तै अर्का केन्द्रीय सदस्य रमेश रिजालले पनि सभापति देउवाका कारण मात्रै निर्वाचनमा पराजय नभएको जिकिर गरे । ‘‘प्रतिनिधसभा र प्रदेशसभा निर्वाचनमा पार्टीले व्यहोरेको हारको कारण सभापति मात्रै होइनन्’’, उनले वरिष्ठ नेता पौडेल र केन्द्रीय सदस्य सिँहतर्फ लक्षित गर्दैै भने, ‘‘पार्टीभित्रको कुरा बाहिर छताछुल्ल नगर्नुस् । यो बाटो गलत हो ।’’

संस्थापक नेता कृष्णप्रसाद भट्टराईलाई अपमानपूर्वक हराएर पाखा लगाएका कारण कांग्रेसमा बिजारोपण भएको गुटलाई पछिल्लो समय मलजल गर्ने परिपाटी मौलाएको भन्दै केन्द्रीय सदस्य रिजालले आपत्ति जनाए । ‘‘गुटको राजनीति नगरौं । पार्टी अघि बढाउन एकजुट भएर जानुको विकल्प छैन्,” उनले भने, ‘‘एकजुट भएमात्रै सबैको कल्याण हुन्छ । भविश्य नेपाली कांग्रेसकै हो । आत्तिहाल्नुपर्दैन ।”

मंगलबारको बैठकमा पौडेल पक्षीय नेताहरुले टिकट वितरणमा अनियमितता भएको भन्दै आरोप लगाएपछि संस्थापन पक्षीय नेताहरुले बिहीबारको बैठकमा कडा रुपले प्रतिवाद गरेका छन् । ‘‘टिकट वितरणमा कुनै अनियमितता भएको छैन । सामुहिक रुपमा टिकट वितरण गरिएको हो,” केनद्रीय सदस्य कार्कीले भने, ‘‘सभापतिज्यूले उद्दारतापूर्वक सबैको कुरा सुन्नुभएको हो । अनियमितता भयो भनेर कुरा बढाउन नैतिक रुपले दिँदैन ।”

संस्थापन पक्षीय केन्द्रीय सदस्यहरुले दुई ठूला कम्युनिष्ट दलबीचको चुनावी तालमेलकै कारण निर्वाचन हारिएको जिकीर गर्दै पार्टीभित्रको अन्तर्घात र कांग्रेसले चुनावी तालमेल गरेका दलहरुको असहयोग पनि कारण बनेको स्वीकार गरेका छन् । त्यस्तै उनीहरुले भारतीय नाकाबन्दीका बेला पार्टीले कुनै प्रतिक्रिया नदिएर पनि चुनावताका घाटा व्यहोरिएको बताएका छन् । 

‘‘भारतलाई नाकाबन्दी नलगाउन हामीले कन्भिन्स् गर्न सकेनौं र नाकाबन्दीलाई मित्रवत भएनसम्म भन्न सकेनौं । यसले पनि कांग्रेसलाई क्षति पुगेको हो,’’ केन्द्रीय सदस्य कार्कीले भने । उनले जनमत अझै पनि नघटेको दावी गर्दै जनताले उमेदवारलाई ‘रिजेक्ट’ गर्नुको कारण विश्लेषण गर्न आवश्यक देखिएको बताए । 

केन्द्रीय सदस्य रिजालले अब पार्टीलाई बलियो बनाएर एकताका साथ जनमुखी कार्यक्रम लिएर जनतामा जानुपर्ने आवश्यकता औंल्याए । ‘‘अब पार्टी बलियो बनाउन एकतावद्ध ढंगले जनमुखी कार्यक्रम लिएर सभापतिज्यू आक्रामक रुपले अघि बढ्नुपर्छ । यसैमा सबैको भलो हुन्छ,’’ उनले समीक्षा बैठकमा भने । 

बिहीबारको बैठकमा संस्थापन पक्षीय केन्द्रीय सदस्यहरु ज्ञानेन्द्रबहादुर कार्की, महेन्द्र यादव, रमेश रिजाल र भिष्मराज आङदम्बेले चुनावको समयमा बद्लिएको चुनावी चित्रलाई बदल्न नसक्दा पराजय भोग्नुपरेको धारणा राखेका थिए । 

‘‘उहाँहरुले कम्युनिष्ट गठबन्धन हुँदै गरेको अवस्थालाई रोक्न नसकेको विश्लेषण गर्नुभयो,” कांग्रेस प्रवक्ता विश्वप्रकाश शर्माले भने, ‘‘बाम गठबन्धनको उपस्थिति र समयमै त्यसलाई चिर्न सक्ने गरी पार्टीको प्रभावकारी प्रस्तुति नहुँदा पराजय भोग्नु परेको भन्ने उहाँहरुको धारण रह्यो ।’’