काठमाडौं । नेकपा (एकीकृत समाजवादी)की नेत्री रामकुमारी झाँक्रीले गणतन्त्रमाथि प्रश्न उठाउने समय नभएको बताएकी छन् । शनिबार (जेठ १७) ललितपुरमा आयोजित एक कार्यक्रममा उनले यस्तो बताएकी हुन् ।

उनले गणतन्त्रका १८, संविधान जारी गरेको करिब १० वर्षमा किन प्रश्न उठाइयो त भन्ने बारेमा सोच्न जरुरी रहेकामा जोड दिइन् । “गणतन्त्रमा अभ्यास गरेका १८ वर्ष, संविधान जारी गरेका करिब १० वर्षमा किन प्रश्न उठ्यो त भन्ने प्रश्न छ । गणतन्त्रमा प्रश्न उठ्ने समय नै भएको थिएन,” उनले भनिन्, “तर, त्यो व्यवस्था ल्याउँदा हामीले गरेका प्रतिबद्धताका बारेमा हाम्रा बुझाइहरू एउटै थिएनन् ।”

गणतन्त्रलाई विवादित बनाइएको भन्दै उनले असन्तुष्टि जनाइन् । उनले भनिन्, “यो व्यवस्थामा हामीले काम गर्नुपर्छ, त्यो हाम्रो जिम्मेवारी हो भन्ने कुरा जिम्मेवारीबोध हामीले कम महसुस गर्‍यौँ कि ?”

नेत्री झाँक्रीले सम्भव नहुने सपना बाँड्न नहुने बताइन् । उनले भनिन्, “तिलस्मी सपनाहरू बाँडेर मात्रै बस्यौँ, काम गरेनौँ कि ?” न्युज एजेन्सी नेपाल