काठमाडौं । प्रधानमन्त्री एवम् नेपाली कांग्रेसका सभापति शेरबहादुर देउवा पार्टीको महासमिति बैठकको तयारीमा लागेका छन् । पार्टीभित्र प्रतिनिधिसभा र प्रदेशसभा निर्वाचनका बारेमा समीक्षा गर्नुपर्ने माग उठेपछि देउवा महासमिति बैठक बोलाउने निष्कर्षमा पुगेका हुन् । 

कांग्रेसका युवा नेताहरुले लिखित रुपमै महासमिति बैठक बोलाएर पार्टीको विशेष महाधिवेशन बोलाउनुपर्ने माग गरेपछि देउवालाई महासमिति बैठक बोलाउन नैतिक दबाब परेको छ । कांग्रेसका युवा नेताहरु चन्द्र भण्डारी, गगन थापा, धनराज गुरुङ, विश्वप्रकाश शर्मा, बद्री पाण्डेय, प्रदीप पौडेल र गुरुराज घिमिरेले केही दिनअघि लिखित रुपमै चुनावको समीक्षा गर्न केन्द्रीय समिति र महासमिति बैठक बोलाउनुपर्ने माग राखेका थिए । उनीहरुले प्रतिनिधिसभा र प्रदेशसभा चुनावमा पार्टीको नेतृत्वकै कारण पराजय भोग्नुपरेको दाबी गर्दै वर्तमान नेतृत्वले राजीनामा दिनुपर्ने बताउँदै आएका छन् । 

महासमिति बैठकको तयारीका लागि प्रधानमन्त्री देउवाले आज (बिहीबार) पार्टीको केन्द्रीय कार्यसम्पादन समितिको बैठक बोलाएका छन् । पार्टीको महासमिति बैठकबारेमा छलफल गर्न आज दिउँसो ३ वजे बालुवाटारमा बैठक बस्न लागेको हो । प्रधानमन्त्री देउवाका स्वकीय सचिव विरेन्द्र थापाले देशको पछिल्लो राजनीतिक अवस्था र महासमिति बैठकका लागि गर्नुपर्ने तयारीका विषयमा छलफल गर्न बैठक बोलाइएको बताए । 

कांग्रेसका युवा नेताहरुले नेतृत्वले राजीनामा दिएर नेतृत्व पुस्ता हस्तान्तरण गर्नुपर्ने बताइरहे पनि संस्थापन पक्ष भने राजीनामा दिनु नपर्ने बताउँदै आएको छ । कांग्रेसको विधानअनुसार महाधिवेशनबाट मात्रै नेतृत्व परिवर्तन हुने स्पष्ट व्यवस्था भएकाले केन्द्रीय समिति र महासमिति बैठकले नेतृत्व परिवर्तन गर्न नसक्ने संस्थापन पक्षका नेताहरुको भनाइ छ । 

प्रधानमन्त्री देउवा निकट मानिने कांग्रेस नेता बालकृष्ण खाँणले महासमिति बैठकमा पार्टीको आगामी रणनीति तय गर्नेदेखि लिएर विधान परिस्थितिकरण गरिने बताउँदै आएका छन् । 
महासमिति बैठकमा पार्टी सभापति, वरिष्ठ नेता, महामन्त्रीलगायतका पदाधिकारी र केन्द्रीय सदस्यहरुले नेतृत्व परिवर्तनका लागि इच्छा प्रकट गरे विशेष महाधिवेशन गरेर नयाँ नेतृत्व चयन गर्न सकिने उनको भनाइ छ ।