काठमाडौं । छत्तीसगढमा जारी माओवादी विरोधी अभियानमा, प्रहरीले बुधबार २२ माओवादी मारिएको दाबी गरेको छ ।

बस्तरमा तैनाथ एक वरिष्ठ प्रहरी अधिकारीले बीबीसीलाई भने, "छत्तीसगढ र तेलंगानाको अन्तरराज्यीय सीमामा पर्ने करेगुट्टालु नामक पहाड र वरपरका जंगलहरूमा केन्द्रित अपरेसन संकल्पअन्तर्गत हालसम्म २६ नक्सलीहरू मारिएका छन् । यो अपरेसन अप्रिल २१ देखि जारी छ ।"

यस घटनाको बारेमा छत्तीसगढका मुख्यमन्त्री विष्णुदेव साईले सामाजिक सञ्जाल एक्समा पोस्ट गर्दै भने, "हाम्रा सुरक्षा बलहरूले बिजापुर जिल्लाको करेगुटा पहाडमा चलिरहेको नक्सलविरोधी अभियानमा ठूलो सफलता हासिल गरेका छन् । हालसम्म २२ भन्दा बढी नक्सलीहरू मुठभेडमा मारिएको रिपोर्ट गरिएको छ ।"

करेगुट्टालुका पहाड, उपत्यका र गुफाहरूमा ठूलो संख्यामा माओवादीहरू लुकेर बसेका केन्द्रीय र राज्य सुरक्षा बलहरूको अनुमान छ ।

छत्तीसगढको राजधानी रायपुरबाट करिब ४५० किलोमिटर टाढा रहेको करेगुट्टालुमा भएको अपरेसनलाई सुरक्षा बलले माओवादीहरूविरुद्धको 'निर्णायक' अपरेसनको रूपमा वर्णन गरिरहेको छ ।