काठमाडौं । लगातार ऋणात्मक रहेको औद्योगिक क्षेत्र चालु आर्थिक वर्षमा आएर धनात्मक भएको छ । चालु आर्थिक वर्षमा औद्योगिक क्षेत्रको कुल गार्हस्थ्य उत्पादन (जीडीपी)मा ४.९८ प्रतिशत योगदान रहने प्रक्षेपण सार्वजनिक भएको छ ।

गत वर्ष ऋणात्मक रहेको उद्योग क्षेत्र यो धनात्मक हुन पुगेको राष्ट्रिय तथ्यांक कार्यालयले जनाएको छ । संशोधित तथ्यांकअनुसार गत आर्थिक वर्ष २०८०/८१ मा यस क्षेत्रको वृद्धिदर २.०२ प्रतिशत ऋणात्मक रहने अनुमान गरिएको छ ।

त्यसैगरी, आर्थिक वर्ष २०७९/८० को तथ्यांकअनुसार उक्त वर्ष यस क्षेत्रको वृद्धि १.७० प्रतिशत ऋणात्मक कायम भएको थियो । यस क्षेत्रमा अघिल्लो दुई आर्थिक वर्ष २०७९/८० र २०८०/८१ मा ऋणात्मक वृद्धिदर देखिए पनि चालु आर्थिक वर्षमा भने सुधारको संकेत देखिएको कार्यालयले जनाएको छ ।

वनस्पति तेल, प्लाइउड, प्लाष्टिकको पाइप फिटिङ, पेय पदार्थ, सिमेन्ट, साबुन लगायतका वस्तुको उत्पादनमा भएको उल्लेख्य वृद्धिले यस क्षेत्रमा सुधार आउने प्रारम्भिक अनुमान गरिएको कार्यालयको भनाइ छ ।

भटमासको कच्चा तेल, जस्तापाता तथा फलामे रडको कच्चा पदार्थ, कोइलालगायत कच्चा पदार्थको आयतमा भएको वृद्धि र उत्पादित वस्तुको मागमा भएको वृद्धिका कारणले पनि उद्योग क्षेत्रको उत्पादन वृद्धिमा सकारात्मक प्रभाव पारेको देखिएको छ ।

विश्व बैंकअन्तर्गतको अन्तर्राष्ट्रिय वित्त निगम (आईएफसी) र नेपाल उद्योग वाणिज्य संघले संयुक्त रूपमा दुई वर्षअघि गरेको एक अध्ययनले अर्थतन्त्रमा निजी क्षेत्रको योगदान ८१ प्रतिशत पुगेको प्रतिवेदन सार्वजनिक गरेको थियो ।

यस्तै, कार्यालयले एक वर्षमा कुल पुँजी निर्माण १७ खर्ब १३ अर्ब रुपैयाँ रहेको जानकारी दिएको छ । जसमा निजी क्षेत्रको ६१, सरकारको २१ र सार्वजनिक संस्थानको ८ प्रतिशत हिस्सा रहेको जानकारी दिएको छ ।

औद्योगिक उत्पादनका साथै आर्थिक वृद्धि पनि ४.६१ प्रतिशत हुने अनुमान गरिएको छ । कार्यालयले गत आर्थिक वर्षमा मुलुकको आर्थिक वृद्धि ३.८७ प्रतिशत भएको जानकारी दिएको थियो ।

कार्यालयले मुलुकको अर्थतन्त्रको आकार बढेर ६१ खर्ब ७ अर्ब रुपैयाँ पुगेको कार्यालयले जनाएको छ । गत वर्ष नेपालको अर्थतन्त्रको आकार गत वर्ष ५७ खर्ब ४ अर्ब रुपैयाँ थियो । एक वर्षमा अर्थतन्त्रको आकार चार खर्ब रुपैयाँ बढेको कार्यालयले जनाएको छ । यस्तै अघिल्लो वर्ष अर्थतन्त्रको आकार ४८ खर्ब ५३ अर्ब रुपैयाँ थियो ।

कार्यालयका अनुसार कृषि क्षेत्रको वृद्धि ३.२३, गैरकृषि क्षेत्रको ४.२८ प्रतिशत रहेको अनुमान छ । कार्यालयले नौ महिनाको तथ्यांक प्रयोग गरेर बाँकी अवधिको तथ्यांकीय विधिको प्रयोग गरी अनुमान गरिएको जनाएको छ ।