काठमाडौं । चीनले अमेरिकी उत्पादन भएका केही वस्तुहरूलाई लाग्ने १२५ प्रतिशत आयात करमा छुट दिने सूची तयार गरिरहेको छ । 

स्रोतलाई उदृत गर्दै समाचार संस्था रोयटर्सले जनाएअनुसार चिनियाँ सरकारले यस विषयमा कम्पनीहरूलाई गुपचुपरूपमा सूचना दिएको रोयटर्सले बताएको छ । चीनले अमेरिकासँगको व्यापार युद्धको प्रभाव कम गर्न यस्तो कदम चाल्न लागेको बताइएको छ ।

चीनले पहिल्यै केही सीमित वस्तुहरू जस्तैः फार्मास्युटिकल, माइक्रोचिप र एयरक्राफ्ट इन्जिनमा कर छुट दिएको छ । कम्पनीहरूलाई आयात कर छुट दिनुपर्ने अन्य आवश्यक वस्तुहरू के–के हुन् खुलाउन आग्रह गरिरहेको बताइएको छ । 

चीनले भित्रभित्र यस्तो गोप्य नीति लागु गरे पनि सार्वजनिक रूपमा भने आफूविरुद्ध अमेरिकाले लगाएको १४५ प्रतिशत आयात कर नहटाएसम्म डटेर लड्ने बताउँदै आएको छ ।

यो सूचीमा समावेश गरिएका वस्तुहरू कति र कुन–कुन छन् भन्ने स्पष्ट छैन । सूची पनि सार्वजनिक गरिएको छैन । 

सरकारले आयात कम्पनीहरूलाई व्यक्तिगत रूपमा सम्पर्क गरी आयात करबाट छुट पाउने उत्पादनहरूको वर्गीकरण सूचीको बारेमा जानकारी दिँदै गरिएको रोयटर्सले जनाएको छ । 

शांघाई पुडोङ सरकारले सोमबार उनीहरूको कम्पनीलाई यो सूचीको बारेमा जानकारी दिएको थियो । यसअघि उक्त कम्पनीले आफ्ना केही उत्पादनहरूमा अमेरिकी प्रविधि आवश्यक भएकाले शुल्क छुटको लागि लबिङ गरेको थियो ।

“हामीलाई अहिले पनि धेरै प्रविधियुक्त सामानहरू अमेरिकाबाट खरिद गर्दै आइरहेका छौँ,” उनले भने ।

अर्को एक स्रोतले चीनले केही कम्पनीहरूलाई आफ्ना आयातित वस्तुहरू छुटको योग्य छन् कि छैनन् थाहा पाउँन सरकारी अधिकारीहरूसँग व्यक्तिगत रूपमा सम्पर्क गर्न लगाइएको बताएको छ ।