गोरखा । गोरखामा चट्याङ लागेर एकजनाको मृत्यु भएको छ । दुईजना घाइते छन् ।

चट्याङ लागेर सहिद लखन गाउँपालिका–१, बक्राङका ४२ वर्षीय राजु खनालको मृत्यु भएको जिल्ला प्रहरी कार्यालय गोरखाका सूचना अधिकारी एवं इन्स्पेक्टर धुव्रप्रसाद शर्माले जानकारी दिए ।

आइतबार (वैशाख १४) साँझ अन्दाजी ७ः५० बजे घरमा बसिरहेका बेला एक्कासि परेको चट्याङ लागेर खनाल गम्भीर घाइते भएका थिए । घाइते खनाललाई प्रदेश अस्पतालमा उपचारका निम्ति ल्याइए पनि चिकित्सकले मृत घोषणा गरेको इन्स्पेक्टर शर्माले जानकारी दिए ।

आइतबार साँझ नै पालुङटार नगरपालिका–७, च्याङलीमा चट्याङ लागेर ५० वर्षीया सुकमाया आले र १८ वर्षीय विपना आले घाइते भएका छन् । चितवनस्थित पुरानो मेडिकल कलेजमा उनीहरूको उपचार भइरहेको प्रहरीले जनाएको छ । रासस