काठमाडौं । ताप्लेजुङमा चट्याङपछि झोलिएको तारले गाडी दुर्घटना भएको खुलेको छ । आइतबार चट्याङका कारण इन्सुलेटर (तार अड्काउने उपकरण)मा क्षति पुगेपछि झोलिएको तारले दुर्घटना निम्त्याएको नेपाल विद्युत् प्राधिकरणका प्रवक्ता राजाभाइ शिल्पकारले जानकारी दिए ।
“चट्याङका कारण इन्सुलेटरमा क्षति पुगेपछि तार झोलियो । बिहानै तुवाँलोले गर्दा उहाँहरूले तार देख्नुभएनछ, नराम्रो घटना भयो,” शिल्पकारले बाह्रखरीसित भने, “बीचमा पानी जमेका कारण गाडीले छेउ च्याप्दा झोलिएको तारमा छोएछ ।”
प्राधिकरणले दुर्घटनाबारे थप छानबिन गरिरहेको छ । विनियमअनुसार क्षतिपूर्तिको व्यवस्था गर्ने शिल्पकार बताउँछन् ।
विद्युतीय दुर्घटनामा मृत्य हुँदा पाँच लाख रुपैयाँसम्म क्षतिपूर्ति दिने व्यवस्था छ । प्राधिकरणको पछिल्लो बोर्ड बैठकले १० लाखसम्मको क्षतिपूर्ति दिने व्यवस्था गरेको थियो । तर, कार्यान्वयनमा आइनसकेको प्रवक्ता शिल्पकारले बताए ।
सोमबार (वैशाख ८) बिहान पाथीभरा जाँदै गर्दा फुङ्लिङ नगरपालिका–१०, सेवारोचोकमा मे१च ३०११ नम्बरको बोलेरो जीपमाथिको छतमा बिजुली तार खसेको थियो । त्यसलगत्तै, आगलागी हुँदा चारजनाको मृत्यु भएको थियो ।
घटनामा ४५ वर्षीया सविना आचार्य र उनका १० वर्षीय छोरा सविन घाइते भएका थिए ।
-1747106471.jpg)
-1745727458.jpg)
-1718633678.jpg)
