गाजा सिटी । हमासको सशस्त्र शाखाले शनिबार (अप्रिल १९) गाजामा जीवित इजरायली बन्धक हिब्रु भाषामा टेलिफोनमा कुरा गरिरहेको भिडियो जारी गरेको छ ।

इजरायली मिडियाले उनलाई एल्काना बोहबोटका रूपमा पहिचान गरेको छ । उनलाई सन् २०२३ अक्टोबर ७ को आक्रमणका क्रममा हमासले दक्षिणी इजरायलको एउटा संगीत महोत्सवस्थलबाट अपहरण गरेको थियो । हमासको उक्त आक्रमणपछि गाजामा युद्ध सुरु भएको थियो ।

इजेदिन अल–कसम ब्रिगेडले जारी गरेको चार मिनेटभन्दा बढीको ‘क्लिप’मा उनी सानो कोठामा बसेर साथी र परिवारका केही सदस्यसँग कुरा गरिरहेको देखिन्छ ।

यस्तो कल वास्तवमा भएको हो कि होइन भनेर पुष्टि हुन सकेन । र, एएफपीले भिडियो कहिले खिचिएको थियो भनेर प्रमाणित गर्न सकेन ।

फुटेजमा बोहबोटले ल्यान्डलाइन टेलिफोनमा कुरा गरेको देखिन्छ, जसमा उनले एक साथीलाई आफ्नी श्रीमतीलाई ह्वाइट हाउसमा लगेर अमेरिकी राष्ट्रपति डोनाल्ड ट्रम्पलाई भेट्न आग्रह गरेको देखिन्छ ।

हालैका हप्तामा बोहबोटको यो तेस्रो यस्तो भिडियो हो । अघिल्लो क्लिप मार्चको अन्त्यमा जारी गरिएको थियो । त्यस भिडियोमा उनले इजरायली सरकारलाई आफ्नो स्वतन्त्रता निश्चित गर्न अनुरोध गरेका थिए ।

सन् २०२३ मा हमासले इजरायलमा गरेको आक्रमणक्रममा २५१ जनालाई बन्धक बनाएको थियो । तीमध्ये ५८ जनालाई गाजामा बन्दी बनाइएको थियो । बन्दीमध्ये ३४ जनाको मृत्यु भएको इजरायली सेनाले जनाएको छ । रासस/एएफपी