काठमाडौं । अराजकता फैलाउने गतिविधि सह्य नहुने भन्दै गृह मन्त्रालयले चेतावनी दिएको छ । यस्ता गतिविधिमा संलग्न हुने जोसुकैलाई कारबाही गरिने गृहका प्रवक्ता रामचन्द्र तिवारीले शनिबार जारी गरेको विज्ञप्तिमा उल्लेख छ ।

“संविधान र कानुनको ठाडो उल्लंघन गर्न प्रोत्साहित गर्ने र समाजमा अराजकता फैलाउने कुनै पनि गतिविधि सह्य नहुने र यस्तो गतिविधिमा संलग्न हुने जोसुकैलाई कानुनबमोजिम कारवबाही हुने व्यहोरा सूचित गरिन्छ,” विज्ञप्तिमा भनिएको छ ।

राष्ट्रिय प्रजातन्त्र पार्टी (राप्रपा)का नेता–कार्यकर्ताले आइतबार (वैशाख ७) काठमाडौंमा प्रदर्शन गर्न लागेका छन् । त्यसक्रममा निषेधित क्षेत्र तोड्नेसम्बन्धी अभिव्यक्तिप्रति मन्त्रालयको गम्भीर ध्यानाकर्षण भएको विज्ञप्तिमा जनाइएको छ ।

• शिक्षक बिहान, दिउँसो सडकमा उत्रँदै राप्रपा नेता

मन्त्रालयले गैरकानुनी क्रियाकलापमा संलग्न नहुन आग्रह गरेको छ । “समाजमा हिंसा फैलाउने कुनै पनि अराजक, उत्तेजक र गैरकानुनी क्रियाकलापमा संलग्न नहुन समेत गृह मन्त्रालय सबैमा अनुरोध गर्दछ,” विज्ञप्तिमा उल्लेख छ ।