काठमाडौं । तीनकुने घटनामा पक्राउ परेका राष्ट्रिय प्रजातन्त्र पार्टी (राप्रपा)का महामन्त्री एवं सांसद धवलशमशेर राणा शुक्रबार थुनामुक्त भएनन् ।

उनी उपचारका प्रयोजनका लागि थुनाबाहिर बस्नेगरी छुट्न लागेका थिए । शुक्रबार छुट्ने भनिएपछि भद्रकालीस्थित प्रहरी परिसरमा कार्यकर्ताको भिड लागेको थियो ।

काठमाडौं प्रहरी प्रमुख एसएसपी विश्व अधिकारीका अनुसार, कागजपत्र नमिलेका कारण आज नछुटेका हुन् । "क्यान्सरको उपचारका लागि फलोअपमा भारत जानुपर्ने भएकाले छाड्ने तयारी थियो तर कागजपत्र नमिलेका कारण आज नछुटेका हुन्," उनले भने ।

उनी क्यान्सरका बिरामी हुन् । सोही कारण उपचारका लागि उनलाई छाड्ने सुविधा दिन लागेको हो । उनीमाथि लागेको आरोपबारे भने प्रहरीले अनुसन्धान जारी नै राख्नेछ ।

गएको चैत १५ गते राजतन्त्र पुनर्स्थापना गर्ने भन्दै तीनकुनेमा आयोजना गरिएको प्रदर्शन अराजक बन्दा दुईजनाको ज्यान नै गएको थियो । पत्रकार सुरेश रजक र सविन महर्जनको ज्यान गएको थियो । सोही घटनाको अनुसन्धानका लागि प्रहरीले राप्रपाका उपाध्यक्ष रवीन्द्र मिश्र र धवलशमेशरलाई सोही दिन पक्राउ गरेको थियो ।