काठमाडौं । फुटबलको सर्वाेच्च निकाय फिफाले अखिल नेपाल फुटबल संघ(एन्फा)का पूर्वअध्यक्ष गणेश थापामाथि लगााएको प्रतिबन्ध सकिएको छ । भ्रष्टाचारमा दोषी ठहर गर्दै फिफाले थापामाथि लगााएको १० वर्षे प्रतिबन्ध गएको मंगलबार सकिएको हो ।

पूर्वअध्यक्ष थापाले एक विज्ञप्तिमार्फत आफूमाथिको प्रतिबन्ध सकिएको जनाएका छन् । उनले अब आफू आगामी दिनमा फुटबलको विकासमा लागिपर्ने बताएका छन् ।

“कठिन १० वर्ष अवधिपश्चात्, मेरो फुटबल सम्बन्धित सबै गतिविधिबाट भएको निलम्बन अब समाप्त भएको छ,” थापाले विज्ञप्तिमा भनेका छन्, “यो यात्रा चुनौतीपूर्ण थियो । तर, यस अवधिमा मेरो परिवार, साथी, शुभचिन्तक र समस्त फुटबल प्रेमीहरूले गर्नुभएको सहयोग र अटल समर्थनका लागि म धन्यवाद र आभार व्यक्त गर्न चाहान्छु । नेपाली फुटबलको विकास र विस्तारमा साथ र सहयोग सधैँ रहनेछ ।”

फिफाले २०७२ मा थापालाई १० वर्षका निम्ति कुनै पनि फुटबल गतिविधिमा सहभागी हुन नपाउने गरी प्रतिबन्ध लगाएको थियो ।

थापाले तत्कालीन एएफसीका अध्यक्ष मोहम्मद बिन हमामसँग रकम लिएको पाइएपछि फिफाले १० वर्षका लागि प्रतिबन्ध लगाएको थियो ।