काठमाडौं । सहिद स्मारक 'बी' डिभिजन लिगमा झापा फुटबल क्लबले अन्नपूर्ण आरसिटी क्लबविरुद्ध कठिन जित निकालेको छ । बुधबार सातदोबाटोस्थित एन्फा मुख्यालयमा सम्पन्न पहिलो खेलमा झापाले आरसिटीविरुद्ध २–१ को कठिन जित निकालेको हो ।

झापाको जितमा प्रदीप बुढाथोकी र मनीष लिम्बूले गोल गरेका थिए । आरसिटीका लागि प्रज्वल गुरुङले एक गोल फर्काए पनि टोलीको पराजय टार्न सकेनन् ।

२०औँ मिनेटमा प्रदीपले पेनाल्टी अवसरमा गोल गर्दै झापालाई अग्रता दिलाए । ४२औँ मिनेटमा मनीष लिम्बूले गोल गर्दै अग्रता दोब्बर बनाए । ५५औँ मिनेटमा आरसिटीका प्रज्वल गुरुङले एक गोल फर्काए ।

जितसँगै बी डिभिजनमा नवप्रवेशी टोली झापाले दोस्रो जित निकालेको छ ।  झापाले पाँच खेलमा दुई जित, दुई हार र एक बराबरीसँगै कुल सात अंक बनाएको छ । यसअघि उसले सरस्वती युथ क्लबलाई २–० ले पराजित गरेको थियो ।

पराजित आरसिटी भने तेस्रो हार व्यहोर्दै एक जित र एक बराबरीसहित चार अंकमा सीमित भएको छ ।