काठमाडौं । शिक्षक आन्दोलनका कारण काठमाडौंको सवारी आवागमन अस्तव्यस्त बनेको छ । आन्दोलनरत शिक्षकहरूले माइतीघरदेखि बानेश्वरसम्मको पूरै सडकमा प्रदर्शन गरेपछि तीनकुने–माइतीघर सडक बन्द गरिएको छ ।

काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक दीपक गिरीले शिक्षकले पूरै सडक ढाकेर प्रदर्शन गर्दा यातायात व्यवस्थापनमा समस्या आएको बताए ।

“कोटेश्वरबाट आएका सवारी साधनलाई तीनकुनेबाट सिनामंगल रातोपुलतर्फ, भद्रकाली हुँदै गइरहेका सवारी साधनलाई माइतीघरबाट, त्रिपुरेश्वरबाट गइरहेका सवारी साधनलाई थापाथलीबाटै डाइभर्ट गरिएको छ,” गिरीले भने ।

अन्य सडकमा पनि सवारी क्युमा रहेकाले वैकल्पिक मार्ग प्रयोग गर्न ट्राफिक प्रहरीले अनुरोध गरेको छ ।