काठमाडौं । सहिद स्मारक ‘बी’ डिभिजन लिगमा प्लानिङ ब्वाइज युनाइटेडले लगातार पाँचौँ जित निकालेको छ । मंगलबार (चैत २६) सातदोबाटास्थित एन्फा मुख्यालयमा प्लानिङ ब्वाइजले सरस्वती क्लबलाई ३–० ले हरायो ।

प्लानिङको जितमा सुजन डंगोल, सरोज कार्की डोली र फागुराम थारुले गोल गरे । खेलको दोस्रो मिनेटमा सुजनले टिमका निम्ति पहिलो गोल गरेका थिए । ७३औँ मिनेटमा सरोजले अग्रता दोब्बर बनाए । ८२औँ मिनेटमा फागुरामले टिमका निम्ति तेस्रो गोल गर्दै प्लानिङको सहज जित निश्चित गरे ।

त्यसअघि, पहिलो हाफको इन्ज्युरी टाइममा संकल्प खरेलले रातो कार्ड पाएपछि सरस्वती १० खेलाडीमा सीमित भएको थियो ।

जितसँगै प्लानिङ ब्वाइजले लिगमा अपराजित यात्रा कायम राखेको छ । प्लानिङ १५ अंकसहित तालिकाको शीर्ष स्थानमा छ । प्लानिङ ब्वाइजले यसअघि झापा फुटबल क्लब, च्यासल युथ क्लब, मध्यपुर युथ एसोसिएसन र ब्वाइज युनियन क्लबलाई हराएको थियो । पराजित सरस्वतीको ६ अंक छ ।