काठमाडौं । प्रधानमन्त्री केपी शर्मा ओलीले सरकारले शिक्षकका माग सम्बोधन गर्ने प्रतिबद्धता जनाएका छन् । थाइल्यान्डको औपचारिक भ्रमण सकाएर शनिबार (चैत २३) स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थलमा सञ्चारकर्मीसँग यस्तो बताएका हुन् ।

उनले शिक्षक वर्तमान सरकारलाई विश्वास गरेर आफ्ना आवाज सुन्छ भनेर प्रदर्शनमा उत्रिएको भन्दै धन्यवाद दिए । सरकार शिक्षकविरोधी नभएको उनले बताए । शिक्षक पनि सरकारविरोधी नभएको उनले उल्लेख गरे । उनले माग परस्परमा बसेर छलफलबाट टुंग्याइने बताए ।

प्रधानमन्त्री ओलीले भने, “शिक्षकहरूलाई म धन्यवाद भन्न चाहन्छु । किनभने, सरकारमाथि विश्वास गरेर उहाँहरू यो प्रदर्शनमा आउनुभएको छ । नत्र पहिला प्रदर्शन गर्नु हुन्न थियो नि यसरी ! किनभने, प्रदर्शन गर्‍यो गर्‍यो कानमा बतास लाग्दैन भने किन प्रदर्शन गर्ने भन्ने हुन्थ्यो ।”

प्रधानमन्त्री ओलीले काठमाडौंमा आएर प्रदर्शनको दुःख नगर्न आग्रह गर्दै सरकारले माग पूरा गर्ने प्रतिबद्धता जनाए । न्युज एजेन्सी नेपाल