काठमाडौं । चलचित्र ‘खुस्मा’ निर्माण टिमले नयाँ चलचित्र निर्माणको घोषणा गरेको छ । अशोक थापा मगरले निर्देशन गर्ने चलचित्रको नाम ‘जलाकी’ राखिएको छ । 

शुक्रबार टाइटल मोसन पोस्टर सार्वजनिक गर्दै निर्माण टिमले चलचित्रको शुभमुहूर्त गरेको छ । सिनेमाको छायांकन बागलुङको कालिका भगवती मन्दिरबाट सुरु भएको छ । 

त्रिकोणात्मक प्रेम कथामा आधारित ‘शाम्बाला’ फेम्ड अभिनेता सोनाम तोप्देन, उपासना सिंह ठकुरी, अस्तित्व भट्टचन र आकृति राजभण्डारीको मुख्य भूमिका रहेका छ । आकृति राजभण्डारीको ‘जलाकी’ डेव्यु चलचित्र हो । 

कसैको सम्झना र मायाको प्रतिकको रूपमा मानिने ‘जलाकी’ मगर समुदायको आस्थाको प्रतीक ढुंगाले चिनेको स्तम्भलाई बुझाउँछ । 

चलचित्रको छायांकन तीन चरणमा हुने निर्देशक अशोक थापा मगरले बताए । रुकुम, म्याग्दी, बाग्लुङ, पोखराका विभिन्न भूभाग र दक्षिण कोरियामा समेत छायांकन गरिनेछ । चलचित्रले मगर र गुरुङ समुदायको संस्कृति झल्काउनेछ ।

निर्मातामा ओम घर्तीमगर, वीरबहादुर लामा, चन्द्रबहादुर भट्टचन, बेताने मगर, मानबहादुर धनाह मगर र सुस्मिता बुढाथोकी रहेका छन् । 

चलचित्रमा माओत्से गुरुङ, बुद्धि तामाङ, संगीता थापा मगर, राजु रेग्मी मगर, खड्क बहादुर पुन (खबपु)लगायत कलाकारको पनि अभिनय रहनेछ । 

शैलेन्द्र डी कार्कीको डीओपी रहनेछ ।