काठमाडौं । अमेरिकाका संघीय आप्रवासी अधिकारीहरूले उत्तरी वासिङटनको एक छत निर्माण व्यवसायमा छापा मारेर ३७ आप्रवासी मजदुरलाई पक्राउ गरेका छन् ।

इमिग्रेसन एन्ड कस्टम्स एन्फोर्समेन्ट (यूएस आईसीई), होमल्यान्ड सेक्युरिटी इन्भेस्टिगेसन र कस्टम्स एन्ड बोर्डर प्रोटेक्सनका अधिकारीहरूले क्यानडाको सीमानजिकै वासिङटन राज्यको बेलिंगहामस्थित माउन्ट बेकर रुफिङको गोदाममा बुधबार बिहान पुगेर पक्राउ गरेको एसोसिएटेड प्रेस जनाएको छ ।

'अपराधीसरह बन्दुक देखाएर समातियो'

प्रत्यक्षदर्शीहरूले हतियार बोकेका अधिकारीहरूले बन्दुक देखाएर अपराधीजस्तै गरेर कार्यस्थलमा घुसेर पक्राउ गरेको बताएका छन् । उनीहरू कागजात नभएका सबै कामदारको सूची र तस्बिरसहित आएका थिए । एक प्रत्यक्षदर्शीका अनुसार, पक्राउ गरेपछि उनीहरूले भवनको पछाडिको एक कोठामा भेला पारेका थिए ।

माउन्ट बेकर रुफिङमा १२ वर्षदेखि काम गरिरहेका एक कर्मचारीले यस्तो घटना कहिल्यै नदेखेको बताएका छन् । उनका अनुसार, पक्राउ गरिएका मजदुरलाई दुईवटा बसमा राखेर लगिएको थियो ।

कानुनी जाँचअन्तर्गत छापा

आईसीई प्रवक्ता डेभिड योस्टले कागजात नभएका श्रमिकलाई रोजगारी दिनेविरुद्ध चलिरहेको एक आपराधिक मुद्दा जाँचको क्रममा छापा मारिएको बताएका छन् । उनका अनुसार, नक्कली कागजात पेस गरेपछि पक्राउ गरिएको हो ।

एसोसिएटेड प्रेसबाट ।