काठमाडौं । राजसंस्था पुनर्स्थापनाका लागि संयुक्त जनआन्दोलन समितिका कार्यवाहक संयोजक डा. जगमान गुरुङले काठमाडौं महानगरले पूर्वराजा ज्ञानेन्द्र शाहलाई लगाएको जरिवाना फिर्ता लिन आग्रह गरेका छन् । 
 
गुरुङले सोमबार एक विज्ञप्ति जारी गरेर यस्तो आग्रह गरेका हुन् । ‘श्री ज्ञानेन्द्र शाह निर्मल निवास’ भन्ने उल्लेख गरिएको जरिवानापत्रमा समितिको गम्भीर ध्यानाकर्षण भएको भन्दै उनले उक्त पत्राचारबाट पूर्वराजाका सम्बन्धमा भ्रम र अनास्था सिर्जना गर्ने कुत्सित उद्देश्य रहेको ठहर समितिले गरेको छ । 

“उक्त कार्यक्रम कानुनबमोजिम राष्ट्र, राष्ट्रियता, धर्म, संस्कृति र नागरिक बचाउ महाअभियानले अनुमति लिई आयोजना गरिएको नेपाल प्रहरी र जिल्ला प्रशासन कार्यालयको अभिलेखमा समेत उल्लेख रहेको छ,” विज्ञप्तिमा भनिएको छ, “उक्त तथ्यको ज्ञानको अभाव वा भ्रम सिर्जना गर्ने उद्देश्यले गरिएको सो पत्राचार यसपूर्व महानगरपालिका स्वयमले गरेको निर्णय समेतको विपरीत छ ।” 

यसअघि त्रिभुवन अन्तर्राष्ट्रिय विमानस्थलमा पूर्वराजाको स्वागतार्थ आयोजित कार्यक्रमका सन्दर्भमा महानगरले आयोजकलाई यस्तो पत्राचार गरेको थियो । आफ्नै नीतिविपरीत यसपटकको महानगरको निर्णय दुर्भावनायुक्त छैन भन्न नसकिने उनले उल्लेख गरेका छन् । 

“अतः उक्त कार्यक्रमको जिम्मेवारी आयोजक संस्थाहरु स्वयमले लिने हो,” विज्ञप्तिमा भनिएको छ, “सो निर्णय काठमाडौं महानगरपालिकाले तत्काल फिर्ता नलिएमा सो विरुद्ध कानुनी र अन्य मार्गप्रशस्त गरिने पनि सबैमा जानकारी गराउन चाहन्छौँ ।”