काठमाडौं । नेकपा (एकीकृत समाजवादी)ले राजावादीको प्रदर्शनक्रममा गरिएको आगजनी, तोडफोडलगायत घटनाको निन्दा गरेको छ । यही चैत २५ गतेभित्र पार्टीले देशभर भन्डाफोर र प्रदर्शन गर्ने निर्णय गरिएको छ ।

शनिबार (चैत १६) पार्टी केन्द्रीय कार्यालय आलोकनगरमा बसेको स्थायी कमिटी बैठकबाट राजावादीको अराजकताविरुद्ध देशव्यापी भन्डाफोर कार्यक्रम गर्ने निर्णय गरिएको हो । आइतबार (चैत १७) आयोजित पत्रकार सम्मेलनमा पार्टीको केन्द्रीय प्रचार तथा प्रकाशन विभाग प्रमुख प्रकाश ज्वालाले प्रदर्शनका नाममा हत्या, हिंसा, आगजनी, तोडफोड र लुटपाटमा संलग्न व्यक्तिहरूलाई तत्काल कडा कानुनी कारबाही माग गर्ने निर्णय गरिएको जानकारी गराए ।

शुक्रबार (चैत १५) काठमाडौंको तीनकुनेमा आयोजित प्रदर्शनमा उचित ढंगले सुरक्षाकर्मी परिचालन गरेर शान्ति सुरक्षा कायम गर्न नसक्नु सरकारको असक्षमता र कमजोरी भएको एकीकृत समाजवादीको ठहर छ । उनले प्रदर्शनक्रममा मृत्यु भएकाको परिवारलाई उचित क्षतिपूर्ति दिन समेत माग गरे ।

सञ्चारगृहमाथि आक्रमण गरेर प्रेस स्वतन्त्रता कुण्ठित गर्ने दुष्प्रयास गरिएको भन्दै उनले उक्त आक्रमणप्रति पार्टीले निन्दा व्यक्त गरेको बताए । “हाम्रो पार्टी नेकपा (एकीकृत समाजवादी)को काठमाडौं, आलोकनगरस्थित केन्द्रीय कार्यालय र काठमाडौं जिल्ला कार्यालय तथा पार्टी अध्यक्ष कमरेड माधवकुमार नेपालको निवासलगायत स्थानमा भएको ढुंगामुढा, तोडफोड र आगजनीविरुद्ध यही चैत्र २५ गतेभित्र सबै प्रदेश, जिल्ला, स्थानीय कमिटी र जनसंगठनहरूले सम्बन्धित तहमा देशैव्यापी विरोध प्रदर्शन गर्ने निर्णय गरिएको छ,” उनले भने ।

सरकारले उचित सुरक्षा व्यवस्था गर्न नसकेका कारण भौतिक क्षति भएको पार्टीको ठहर छ । न्युज एजेन्सी नेपाल