काठमाडौं । अमेरिकी राष्ट्रपति डोनाल्ड ट्रम्पले छोटो भिडियो सेयरिङ एप टिकटक बेच्न चीनलाई नयाँ प्रस्ताव गरेका छन् । उनले टिकटक बेच्ने सम्झौता सुनिश्चित गर्न चीनमा लगाइएको कर घटाउन सक्ने बताएका छन् ।

टिकटक चिनियाँ कम्पनी बाइटेन्सको स्वामित्वमा छ । ट्रम्पले टिकटकका लागि गैरचिनियाँ खरिददार खोज्न अप्रिल ५ को समयसीमा बढाउन इच्छुक रहेको पनि बताएका छन् ।

यसअघि, जो बाइडेन प्रशासनले टिकटकमाथि प्रतिबन्ध लगाउने कानुन पारित गरेको थियो । तर, जनवरीमा सत्तामा आएपछि ट्रम्पले कानुन लागु गर्न ढिलाइ गरेका थिए ।

अमेरिकामा टिकटकमा प्रतिबन्ध लगाउने कानुन २०२४ मा बनाइएको थियो । टिकटकले अमेरिकाको राष्ट्रिय सुरक्षामा असर गर्ने अमेरिकाको निष्कर्ष छ ।

“टिकटकको विषय टुंग्याउन चीनले भूमिका खेल्नुपर्छ । मलाई लाग्छ, उनीहरूले भूमिका खेल्नेछन्,” ट्रम्पले बुधबार पत्रकारहरूलाई भने, “यसका लागि म कर थोरै कटौती गर्न सक्छु ।”

यस विषयमा सम्झौताको रूपरेखा अप्रिल ५ को समयसीमाभित्र तयार हुने विश्वास ट्रम्पको छ ।

बीबीसीबाट ।