बूढीगण्डकीमा डुबेर एकजनाको मृत्यु

देश

बूढीगण्डकीमा डुबेर एकजनाको मृत्यु

बुधबार, चैत १३, २०८१

बूढीगण्डकीमा डुबेर एकजनाको मृत्यु — प्रतीकात्मक तस्बिर ।

गोरखा । एसइई परीक्षा दिइरहेका एक विद्यार्थीको बूढीगण्डकी नदीमा डुबेर मृत्यु भएको छ । आरुघाट गाउँपालिका–१ का १६ वर्षीय युनिष गुरुङको बूढीगण्डकीमा पौडी खेल्ने क्रममा डुबेर मृत्यु भएको प्रहरीले जनाएको छ ।

“आरुघाट–४, थुमी एसइई दिन आएका उनी बुधबार साँझ पौडी खेल्न बूढीगण्डकीमा गएका थिए,” जिल्ला प्रहरी कार्यालयका प्रहरी नायब उपरीक्षक इन्द्रप्रसाद सुवेदीले भने, “हामीलाई खबर आएपछि इलाका प्रहरी कार्यालय आरुघाट र आर्खेत प्रहरी चौकीबाट खटिएको टोलीले खोजतलास गर्दा शव फेला पारेको हो ।”

खोजीका क्रममा बगाएको स्थानबाट करिब एक किलोमिटर तल गुरुङ मृत अवस्थामा फेला परेका उनले जानकारी दिए । घटनाबारे थप अनुसन्धान भइरहेको जिल्ला प्रहरी कार्यालयले जनाएको छ । रासस