काठमाडौं । गायिका आनी छोइङ डोल्माको लोकप्रिय गीत ‘फूलको आँखामा...’ अब हिन्दीमा पनि रेकर्ड हुने भएको छ । हिन्दी भाषामा अनुवाद गरेर यो गीत रेकर्ड गर्न लागिएको हो । 

भारतीय गीतकार गुलजारले यो गीत अनुवादसमेत गरिसकेका छन् । दुर्गालाल श्रेष्ठले लेखेको गीत गुलजारले हिन्दीमा अनुवाद गरेका हुन् । 

हिन्दीमा पनि आनी स्वयंले यो गीत गाउने छिन् । संगीत र संगीत संयोजन अहिलेकै प्रयोग गर्ने अथवा नयाँ गर्ने भन्ने विषयमा छलफल भइरहेको आनीले बताइन् । 

“गीत कहिले रेकर्ड गरेर सार्वजनिक गर्ने भन्ने विषयमा पनि छलफल भइरहेको छ,” आनी बाह्रखरीसँग भन्छिन्, “मैले नै गाउने भनेर निश्चित भए पनि कम्पोज र एरेन्ज नयाँ गर्ने अथाव अहिलेकोलाई नै प्रयोग गर्ने भन्ने निर्णय भइसकेको छैन ।” 

धेरैले अहिलेकै कम्पोज र संगीत संयोजन प्रयोग गर्न सुझाव दिएको उनले जानकारी दिइन् । 

नेपाली भाषामा गाइएको गीतमा न्यूह् बज्राचार्यको संगीत रहेको छ । संगीत संयोजन गोपाल रसाइलीले गरेका छन् । 

मुम्बईमा आनीको कन्सर्ट हुँदा गुलजारसँग उनको भेट भएको थियो । आनीको कन्सर्ट हेर्न आएका गुलजारसँग उनको त्यहीँ भेट भएको आनीले बताइन् । गुलजार आनीलाई पोमो (छोरी) भनेर सम्बोधन गर्छन् । 

हिन्दीमा अनुवाद गरिएको फूलको आँखामा...