सुनसरी । माध्यमिक शिक्षा परीक्षा (एसईई)मा चिट चोराउन मोबाइलको प्रयोग गरिएको पाइएको छ । यो वर्षको एसईईमा चिट चोराउन मोबाइलमार्फत ह्वाट्सएप प्रयोग गरिएको पुष्टि भएको हो ।

सुनसरीको इनरुवा नगरपालिका–९ स्थित सरस्वती मावि परीक्षा केन्द्रमा गणित विषयको एसईई चलिरहँदा ह्वाट्सएपमार्फत चिट चोर्न सहयोग गर्ने गार्ड रंगेहात पक्राउ परेका छन् । परीक्षा केन्द्रबाट ह्वाट्सएपको प्रयोग गरी चिट चोराउने कार्यमा संलग्न दुई गार्डलाई पक्राउ गरिएको सुनसरीका प्रमुख जिल्ला अधिकारी धर्मेन्द्रकुमार मिश्रले जानकारी दिए ।

परीक्षा केन्द्र अनुगमनमा पुगेको प्रजिअसहितको टोलीलाई देखेर परीक्षा गार्ड (शिक्षक)ले मोबाइल अफ गरेका थिए । त्यसपछि उनीहरूका मोबाइल जाँच गरियो । त्यसक्रममा परीक्षा केन्द्रमा खटाइएका प्रावि शिक्षकको साथमा रहेको मोबाइलबाट चिट चोर्न र चोराउन ह्वाट्सएपमार्फत च्याट गरिएको भेटिएको थियो ।

ह्वाट्सएपमा कुराकानी गर्दै विद्यार्थीको नाम, सिम्बोल नम्बर र बोर्डिङ स्कुलको नामसहित विद्यार्थी संख्या के कति भन्नेबारे च्याट गरिएको पाइएको प्रमुख जिल्ला अधिकारी मिश्रले बताए । पक्राउ परेका शिक्षक श्रवणकुमार चौधरी र रमानन्द मेहतालाई परीक्षा गार्डबाट निष्कासन गरिएको उनले जानकारी दिए ।

यस्तै, अनुगमनका क्रममा इनरुवा–१ स्थित भगवती मावि परीक्षा केन्द्रबाट तीन निरीक्षकलाई नियन्त्रणमा लिइएको प्रजिअ मिश्रले बताए ।

भगवती मावि परीक्षा केन्द्रबाट इनरुवा–५ का मुकेन्द्र यादव, रमानन्द यादव र दिनेशप्रसाद यादवलाई नियन्त्रणमा लिइएको सुनसरीका प्रहरी उपरीक्षक सुमन तिम्सिनाले जानकारी दिए । पक्राउ परेकामाथि थप अनुसन्धान भइरहेको उनले बताए ।

यसैबीच, परीक्षा केन्द्रमा मोबाइल प्रवेशका विषयमा सुनसरी प्रशासनले चेकजाँचमा कडाइ गर्न निर्देशन दिएको छ । सुनसरीको दुहवीबाट अघिल्लो दिन विद्यार्थीबाट जनही १० हजार रुपैयाँ लिने दुई गार्डलाई निष्कासन गरिएको थियो ।

परीक्षा मर्यादित बनाउँदै चिट चोर्ने र चोराउने प्रवृत्तिलाई निरुत्साहित गर्ने गरी परीक्षा केन्द्रलक्षित अनुगमन टोली परिचालन गरिएको प्रजिअ मिश्रले बताए ।

निरीक्षकले ह्वाट्सएप ग्रुप बनाएर भित्रको प्रश्नपत्र बाहिर पठाएर बाहिरबाट सबै प्रश्नको उत्तर लेखेर पठाउने र विद्यार्थीलाई सिकाउने गरेको पाइएको हो ।

यसअघि, गएको बिहीबार सुनसरीकै दुहबीस्थित सरस्वती माध्यमिक विद्यालय र गढीको सरस्वती माध्यमिक विद्यालयबाट दुई/दुई निरीक्षकलाई निष्कासन गरिएको थियो ।

जिल्लाका ५० परीक्षा केन्द्रमा १३ हजार ५७३ परीक्षार्थी सहभागी भएका शिक्षा विकास तथा समन्वय एकाइ प्रमुख खगेन्द्र सुवेदीले जानकारी दिए । रासस