काठमाडौं । नेपाली राष्ट्रिय महिला टिमकी सावित्रा भण्डारी प्रधानमन्त्री राष्ट्रिय प्रतिभा पुरस्कारबाट पुरस्कृत भएकी छन् । शुक्रबार प्रधानमन्त्री तथा मन्त्रिपरिषद्को कार्यालयले आयोजना गरेको राष्ट्रिय प्रतिभा पुरस्कार वितरण समारोहमा पुरस्कार वितरण गरिएको हो ।

समारोहमा प्रधानमन्त्री केपी शर्मा ओलीले फान्सेली लिगमा व्यस्त भएका कारण साम्बाकी अभिभावकलाई सम्मान पत्र हस्तान्तरण गरेका थिए । खेल क्षेत्रमा पुर्‍याएको योगदानको कदर गर्दै भण्डारीलाई पुरस्कार प्रदान गरिएको हो ।

नेपाली फुटबल जगतमा एउटै खेलमा दोहोरो ह्याट्रिक प्रहार गर्न सफल खेलाडी सावित्रा सशस्त्र बलको एपीएफ क्लबकी मुख्य खेलाडी हुन् ।

उनले एपीएफ क्लबलाई क्रमशः चारपटकसम्म उपाधि दिलाउन महत्त्वपूर्ण खेल खेलेकी थिइन् । उनी पटक पटक विभिन्न राष्ट्रिय प्रतियोगिताहरूमा समेत उत्कृष्ट खेलाडी घोषित भइसकेकी छिन् । २०७३, २०७५ सालमा एपीएफले प्रधानसेनापति कप र २०७५ मै राष्ट्रिय लिग जित्दा उनी उत्कृष्ट स्टाइकर चुनिएकी थिइन् ।

नेपालबाट अन्तर्राष्ट्रिय व्यावसायिक फुटबल खेल्ने पहिलो नेपाली महिला खेलाडी पनि सावित्रा नै हुन् । अन्तर्राष्ट्रिय जगतमा समेत उनले सफलता प्राप्त गरेकी छन् । २०१७ सालमा माल्दिभस् महिला लिगमा समेत उनी उत्कृष्ट खेलाडी बनेकी थिइन् । हालसम्म भण्डारीले चार दर्जनभन्दा बढी अन्तर्राष्ट्रिय प्रतियोगिता खेलिसकेकी छन् ।