काठमाडौं । स्वास्थ्य तथा जनसंख्या मन्त्रालयकी अतिरिक्त सचिव डा.संगीता कौशल मिश्रा नयाँ सचिव नियुक्तिपछि मन्त्रालयमा आएकी छैनन् । वरीयताक्रम मिचेर स्वास्थ्यसचिव नियुक्त गरिएको भन्दै असन्तुष्ट उनी विनाजानकारी मन्त्रालयमा अनुपस्थित छिन् ।

गएको फागुन २१ गते नयाँ स्वास्थ्यसचिव नियुक्त भएर आएदेखि नै उनी मन्त्रालयमा अनुपस्थित रहेको कर्मचारीहरू बताउँछन् । “सचिवज्यूले शुक्रबारसम्मको बिदा मात्रै दिन सक्छु भन्नुभएको रहेछ, तर त्यसपछिका दिनमा पनि वहाँको कुनै खबर छैन, मन्त्रालय पनि आउनुभएको छैन,” मन्त्रालयका प्रवक्ता डा. प्रकाश बुढाथोकीले बाह्रखरीसित भने ।

“तपाईं विनाजानकारी बिदामा हुनुहुन्छ रे, राजीनामा दिन लाग्नुभएको हो’ भन्ने बाह्रखरीको प्रश्नमा डा. मिश्राले “म बिदामा छु,” भन्ने संक्षिप्त जवाफ दिइन् ।

सचिव नियुक्तिको विषयलाई लिएर उनले गएको शुक्रबार सर्वोच्च अदालतमा रिट दायर गरेकी थिइन् । मिश्राले रिटमा अतिरिक्त सचिवको सिफारिसमा परेकामध्ये आफू वरीयता तथा कार्यसम्पादनमा अघि रहे पनि नियुक्तिमा भने अन्याय भएको रिटमा उल्लेख छ ।

डा. मिश्राको रिटमाथि आइतबार नै सर्वोच्चले कारण देखाउ आदेश जारी गरेको थियो । जसमा न्यायाधीश बालकृष्ण ढकालको एकल इजलासले कारण देखाउ आदेशका साथै स्वास्थ्य र संघीय मामिला मन्त्रालय दुवै पक्षलाई छलफलका लागि बोलाएको थियो । छलफलको मिति भने तय नभएको सर्वोच्चका सूचना अधिकारी निराजन पाण्डेले जानकारी दिए ।

गत फागुन २१ गतेको मन्त्रिपरिषद् बैठकले डा. विकास देवकोटालाई सचिवमा नियुक्त गरेको थियो । १२औँ तह बढुवाका आधारमा आफू ज्येष्ठ भए पनि महिला भएकै आधारमा वरिष्ठता मिचेर डा.देवकोटालाई सचिव नियुक्त गरिएको उनको दाबी छ ।

सचिवमा सिफारिसमा परेका तीनमध्ये डा. मिश्रा ०७९ असार २३ गते तथा डा. देवकोटा ०७९ चैतमा १२औँ तह अर्थात् अतिरिक्त सचिवमा बढुवा भएका थिए । अर्का उमेदवार डा. टंक बाराकोटी पनि ०७९ चैत १३ मा नै १२औँ तहमा बढुवा भएका थिए । 

तर सेवा प्रवेश र सरकारी सेवा अवधिमा भने डा. देवकोटाको अनुभव बढी थियो । डा.देवकोटा ०५३ सालमा सेवा प्रवेश गरेका थिए । ०५७ सालमा सेवामा प्रवेश गरेकी डा. मिश्रा एक वर्ष मात्रै सरकारी सेवामा रहिन् । खुला प्रतिस्पर्धामार्फत ०७९ मा उनी पुनः सरकारी सेवामा फर्किएकी हुन् ।

यता, मन्त्रालयले भने दुई अतिरिक्त सचिवहरूको बढुवा भए पनि नयाँ अतिरिक्त सचिवका निम्ति आह्वान गरेको छ । यसअघि डा. मिश्रा, डा. देवकोटा र डा. बाराकोटी सो पदमा रहेकोमा डा. देवकोटा स्वास्थ्यसचिव र डा. बराकोटी स्वास्थ्य सेवा विभागको महानिर्देशकमा बढुवा भइसकेका छन् । 

रिक्त दुई पदका निम्ति एघारौँ तहमा कम्तीमा पाँच वर्ष सेवा अवधि पूरा भएका अधिकृतका लागि मन्त्रालयले आवेदन खुला गरेको छ ।