पोखरा । पोखराको पृथ्वीनारायण (पीएन) क्याम्पसमा १६ वर्षपछि स्वतन्त्र विद्यार्थी युनियन (स्ववियु) निर्वाचनको मतदानको तयारी भइरहेको छ । मंगलबार बिहान ८ बजेदेखि नै मतदान सुरु गर्ने भनिए पनि मतपत्रमा देखिएको त्रुटिका कारण अहिलेसम्म मतदान सुरु भएको छैन ।

अखिल छैटौँका उमेदवारको नाम मतपत्रमा रहे पनि मतदान गर्ने कोस्टक छुटेपछि मतदान प्रक्रिया सुरु हुन सकेको छैन ।

अखिल (छैटौँ)का क्याम्पस अध्यक्ष सोमनाथ अधिकारीले विज्ञप्ति जारी गरेर सबै संगठनको सर्वदलीय बैठकको माग गरेका छन् । बैठकबिनै निर्वाचन अगाडि बढाए सम्भावित दुर्घटनाको जिम्मेवारी निर्वाचन आयोग नै हुने उनको चेतावनी छ ।

निर्वाचन समितिले भने कोस्टक छुटेको विषयमा माफी मागिसकेको छ । निर्वाचन अधिकृत प्राडा रामचन्द्र पोखरेलले विज्ञप्तिमार्फत मतपत्र छपाइको क्रममा रहेको जनाएका छन । सर्वपक्षीय बैठकको निर्णयानुसार नयाँ मतपत्र आइसकेपछि मतदान सुरु हुनेछ ।

राष्ट्रियस्तरका नेता उत्पादन गरेको पृथ्वीनारायण क्याम्पसको स्ववियु निर्वाचनमा धेरैको चासो छ । यसअघि, ०६५ सालमा नेकपा (एमाले) निकट अखिल नेपाल स्वतन्त्र विद्यार्थी युनियन (अनेरास्ववियु) बाट रश्मि आचार्य स्ववियु सभापति चुनिएका थिए । त्यसयता पृथ्वी नारायण क्याम्पसमा चुनाव हुन सकेको छैन ।

अहिलेको निर्वाचनमा आठ जनाको उमेदवारी परेको छ । जसमा कमल सुवेदी र विप्लपी न्यौपाने दुईजना स्वतन्त्ररूपमा उठेका छन् भने बाँकी ६ जना राजनीतिक दलको विद्यार्थी संगठनका उमेदवार हुन् ।

एमालेको अनेरास्ववियुबाट विष्णु पौडेल, कांग्रेसको नेपाल विद्यार्थी संघ (नेविसंघ) बाट सुशील न्यौपाने, माओवादीको अनेरास्ववियु (क्रान्तिकारी) बाट नवीन अधिकारी, अनेरास्ववियू, अखिल समाजवादी र अखिल क्रान्तिकारीको संयुक्त प्यानलबाट सन्तोष पौडेल, प्राज्ञिक विद्यार्थी परिषद्‌बाट दिप्सन गुरुङ र अखिल छैटौँबाट मिलन सुनार अध्यक्षका प्रत्यासी छन् ।

समानुपातिकका लागि अध्यक्षको प्यानलमा रहेकाबाहेक नयाँ शक्ति विद्यार्थी युनियन, अखिल क्रान्तिकारी (वैद्य) का उमेदवार पनि चुनावी मैदानमा छन् ।

क्याम्पसमा ९ हजार २७० मतदाता छन् ।

पीएनमा मतदानको तयारी भइरहँदा पोखराकै पश्चिमाञ्चल इन्जिनियरिङ क्याम्पसमा समेत चुनावी प्रक्रिया सहजरूपमा अगाडि बढेको छैन । क्याम्पसको होस्टेलमा रहेका विद्यार्थीले मतदान गरे पनि बाहिरका विद्यार्थीलाई गेटबाट पस्न रोक लगाइएको छ । अन्तिम नामावलीमा नाम काटिएको भन्दै नेविसंघ नेताहरूले क्याम्पस गेटमै अनशन थालेका कारण विद्यार्थीहरू गेटभित्र पस्न पाएका छैनन् ।

यहाँ विद्यार्थीबीच तनावपूर्ण अवस्था छ । एक विद्यार्थी नेताका अनुसार, अन्य विद्यार्थी संगठनले अनशनमा हस्तक्षेप गर्न खोजेका छन् । जसले त्यहाँ तनावपूर्ण स्थिति सिर्जना हुन सक्ने ती नेता बताउँछन् ।

नेविसंघ इन्जिनियरिङ अध्ययन संस्थान पश्चिमाञ्चल क्याम्पस (डब्लूआरसी) को मूल गेटमा नेविसंघ नेता कृष्ण्जंग कार्की र राजिव अधिकारीले सोमबार बेलुकीबाट अनशन थालेका हुन् ।

नेपाल विद्यार्थी संघको तर्फबाट सचिवको उमेदवार रहेका प्रशान्त अधिकारीको नाम निर्वाचन समितिले प्रकाशित नगरेपछि नेविसंघ विरोधमा उत्रिएको हो । निर्वाचन समितिले षड्यन्त्रपूर्वक सचिवको नाम अन्तिम नामावलीमा प्रकाशन नगरेपछि सो नाम कायम गर्न माग गर्दै नेविसंघका १३ केन्द्रीय सदस्यले सामूहिक विज्ञप्ति जारी गर्दै शुक्रबार क्याम्पसका तालाबन्दी गरेका थिए । तर, सोमबार बेलुकीसम्म पनि माग पूरा नगरेको भन्दै क्याम्पसको मूल गेटमै अनशन थालिएको अनशनरत कार्कीले बताए । दर्ता गरेको नाम कायम नभएसम्म स्ववियु निर्वाचन हुन नसक्ने उनीहरूको अडान छ ।

उनीहरूले कांग्रेसको कास्की नेतृत्वलाई पनि आलोचना गरेका छन् । नेविसंघको सचिवको मनोनयन नै नभएको विषयमा पनि कास्की कांग्रेसले प्रशासनसँग मिलेर निर्वाचन अगाडि बढाउन खोजेको आरोप उनीहरूले लगाएका छन् ।

यता पोखराकै नर्सिङ कलेज र वनविज्ञान अध्ययन संस्थानमा भने मतदान भइरहेको छ । विवादका कारण संस्कृत विद्यापीठ र जनप्रिय बहुमुखी क्याम्पसको भने निर्वाचन नै स्थगित भएको छ ।