काठमाडौं । त्रिभुवन विश्वविद्यालय (त्रिवि)का आंगिक र सम्बन्धनप्राप्त क्याम्पसमा स्वतन्त्र विद्यार्थी युनियन (स्ववियु) निर्वाचन सुरु भएको छ ।

मंगलबार (चैत ५) बिहान ८ः०० बजेदेखि ४६ आंगिक र २५० सम्बन्धनप्राप्त क्याम्पसमा निर्वाचन सुरु भएको स्ववियु निर्वाचन केन्द्रीय अनुगमन तथा समन्वय समितिका सदस्यसचिव पशुपति अधिकारीले जानकारी दिए । उनले अधिकांश क्याम्पसमा मतदान सुरु भइसकेको बताए । उनका अनुसार, आजै अपराह्न ४ः०० बजेसम्म मतदान हुनेछ ।

क्याम्पसमा गठित निर्वाचन समितिले मतदानलगत्तै आजै साँझदेखि मतगणना थाल्ने उनले बताए ।

त्रिविले प्रत्येक दुई/दुई वर्षमा स्ववियु निर्वाचन गर्दै आएको छ । निर्वाचनमा राजनीतिक दलनिकट विद्यार्थी संगठन अनेरास्ववियु, नेपाल विद्यार्थी संघ, अनेरास्ववियु (क्रान्तिकारी), अनेरास्ववियू, स्वतन्त्र विद्यार्थी समूहसहितले भाग लिएका छन् ।

०६५ सालदेखि स्ववियु निर्वाचन नियमित हुन सकेको थिएन । एकैपटक ०७३ चैत १५ गते निर्वाचन भएको थियो । त्यसपछि ०७९ चैत ५ गते देशभर केही क्याम्पसबाहेकमा निर्वाचन सम्पन्न भएको थियो ।

त्रिविमा २०१८–१९ देखि प्रत्यक्ष प्रणालीबाट निर्वाचन हुँदै आएकामा ०३० सालसम्म प्रत्येक वर्ष र ०३६ देखि हरेक दुई/दुई वर्षमा निर्वाचन हुन थालेको हो । रासस