काठमाडौं । चालु आर्थिक वर्ष २०८१/८२ को सात महिनामा चालु खाता एक खर्ब ६६ अर्ब ८० करोड रुपैयाँले बचतमा छ । अघिल्लो वर्षको सोही अवधिमा चालु खाता एक खर्ब ६२ अर्ब ५२ करोड रुपैयाँले बचतमा थियो ।

चालु खाता घाटाले अरू देशहरूबाट खुद सापटी लिइएको भन्ने बुझिन्छ । चालु खाता बचतमा रहे अरू देशहरूलाई खुद सापटी दिइएको बुझिन्छ ।

चालु खाता घाटा सुधार हुँदै जानुले हाल नेपालले अरू देशहरूबाट लिएको खुद सापटी घटाउँदै गएको देखिन्छ ।

नेपाल राष्ट्र बैंकका अनुसार, समीक्षा अवधिमा खुद पुँजीगत ट्रान्सफर पाँच अर्ब ८३ करोड रुपैयाँ रहेको छ । अघिल्लो वर्षको सोही अवधिमा यस्तो ट्रान्सफर तीन अर्ब ८० करोड रुपैयाँ थियो ।

यसैगरी, समीक्षा अवधिमा सात अर्ब ४५ करोड प्रत्यक्ष वैदेशिक लगानी (इक्विटी मात्र) भित्रिएको छ । अघिल्लो वर्षको सोही अवधिमा यस्तो प्रत्यक्ष वैदेशिक लगानी (इक्विटी मात्र) पाँच अर्ब १९ करोड भित्रिएको राष्ट्र बैंकले जनाएको छ ।