काठमाडौं । नेपाली कांग्रेसका सभापति शेरबहादुर देउवाले कांग्रेस बलियो भएमात्रै देश समृद्ध हुने बताएका छन् ।

बिहीबार ललितपुरमा नेपाल भूतपूर्व सैनिक संघको छैटौँ केन्द्रीय महाधिवेशन उद्घाटन समारोहमा सभापति देउवाले जनताका कारण कांग्रेस लोकप्रिय पार्टी बनेको बताए । कांग्रेसलाई बलियो बनाउन शुभेच्छुक संस्थाहरू बलियो हुनुपर्ने उनको भनाइ छ ।

पूर्वप्रधानमन्त्रीसमेत रहेका देउवाले लोकतन्त्रमा मात्रै सबैका अधिकार सुरक्षित हुने भएकाले यसमा ध्यान दिन आग्रह गरे ।

गोर्खा भर्ती केन्द्रबारे सभापति देउवाले सरकारसँग छलफल भइरहेकाले समस्या समाधानका लागि कूटनीतिक तवरले कुरा अघि बढाउने प्रतिबद्धता जनाए ।

गोर्खा भूतपूर्व सैनिकको पेन्सन विभेदबारे आफू जानकार रहेको बताउँदै उनले यस विषयमा पनि सम्बन्धित निकायमा कुरा गर्ने आश्वासन दिए ।