काठमाडौं । अमेरिकी राष्ट्रपति डोनाल्ड ट्रम्पले तीन ठूला अटोमेकर कम्पनीलाई क्यानडा र मेक्सिकोबाट हुने आयातमा एक महिनाका लागि कर छुट दिएका छन् ।

जनरल मोटर्स, फोर्ड र स्टेलान्टिसका कार्यकारीको अनुरोध पछि ट्रम्पले घोषणा गरेको २५ प्रतिशत कर लाग्ने प्रावधाना छुट दिएका हुन् । यो छुटका लागि अप्रिल २ सम्ममा अटोमेकरहरूले आफ्नो अपरेसन अमेरिकामा सार्ने आंकलन गरिएको छ ।

अमेरिका–मेक्सिको–क्यानडा सम्झौता (यूएसएमसीए) अनुसार क्यानडा मेक्सिकोबाट हुने धेरैजसो आयातमा कर छुट थियो । उत्तर अमेरिकी व्यापार सम्झौता (एनएफटीए)लाई विस्थापित गर्ने उक्त सम्झौता यसअघि ट्रम्पको पहिलो कार्यकालमा भएको थियो ।

बिग थ्री भनिने यी तीन अटो निर्मातासहित अन्य अटोमेकरको क्यानडा र मेक्सिकोमा उत्पादन र अमेरिका र अन्त निर्यात गर्ने जटिल आपूर्ति श्रृंखला छ ।

क्यानडाका प्रधानमन्त्री जस्टिन ट्रुडोले ट्रम्पसँग बुधबार फोनवार्ता गरेका थिए । फोनवार्तापछि अटो निर्माता कम्पनीबाहेक अन्य केही उत्पादनमा पनि कर छुट दिने वा घटाउने सम्भावना छ ।