काठमाडौं । प्रश्न सोधेकै आधारमा पत्रकारमाथि कारबाही भएको विषयमा सत्तारुढ प्रमुख घटक नेपाली कांग्रेसले असहमति जनाएको छ । 

प्रेस स्वतन्त्रता र अभिव्यक्ति स्वतन्त्रताको पक्षमा कांग्रेस दृढतापूर्वक उभिने कांग्रेसका प्रमुख सचेतक श्याम घिमिरेले बताए । 

बुधबार संसद भवन नयाँ बानेश्वरमा सञ्चारकर्मीसँग कुरा गर्दै घिमिरेले प्रश्न सोधेकै आधारमा पत्रकारमाथि कारबाही हुनु उचित नभएको भन्दै संसद् सचिवालयसँग यस विषयका छलफल गर्ने बताए । 

उनले कारबाही फिर्ता गर्नेतर्फ लाग्ने बताए । घिमिरेले सञ्चारकर्मीलाई पनि मर्यादित भएर प्रश्न गर्न आग्रह गरे ।  

संघीय संसद् सचिवालयले प्रधानमन्त्री केपी शर्मा ओली र सांसदहरूलाई प्रश्न गर्दा गलत शब्द प्रयोग गर्ने दुई पत्रकारको संसद् प्रवेश पास निलम्बन गरेको थियो । यसमा अन्य दलका सांसदले विरोध जनाएका छन् ।