काठमाडौं । नेकपा (एकीकृत समाजवादी)का सम्मानित नेता झलनाथ खनालले तत्काल कुनै पार्टीसँग एकीकरणको सम्भावना नरहेको बताएका छन् । मंगलबार धनुषामा प्रेस संगठन नेपालद्वारा आयोजित पत्रकार सम्मेलनमा उनले यस्तो बताएका हुन् ।

पार्टी एकीकरण गर्नुपर्ने अवस्था नआएको उनले उल्लेख गरे । “तत्काल पार्टी एकीकरण कसैसँग पनि सम्भव छैन,” उनले भने, “तत्काल त्यो अवस्था आएकै छैन ।”

उनले एजेन्डाका आधारमा कार्यगत एकता गर्न सकिने बताए । राष्ट्रियतामाथि खतरा बढेका कारण कार्यगत एकता गर्न सकिने उनको भनाइ थियो ।

“कार्यगत एकता जोसँग पनि सम्भव छ । इस्युमाथि आधारित रहेर कार्यगत एकता गर्न सकिन्छ,” उनले भने, “जस्तो, आज राष्ट्रियतामाथि खतरा बढेको छ, सबै वामपन्थीहरू मात्र होइन, अरू पनि किन एकताबद्ध भएर उभिन सकेका छैनन् ? चुच्चे नक्सा नेपालले बनायो, त्यसलाई कार्यान्वयन गरियोस् भनेर हामी उभिन सक्दैनौँ ?”

चुच्चे नक्साको कार्यान्वयनजस्ता राष्ट्रिय मुद्दामा कार्यगत एकता गर्न सकिने उनले बताए । न्युज एजेन्सी नेपाल