काठमाडौं । अखिल नेपाल फुटबल संघ (एन्फा)का पूर्वअध्यक्ष गणेश थापाले आफूविरुद्ध झुठो आरोप लगाएको भन्दै एन्फाका महासचिव किरण राईविरुद्ध साइबर ब्युरोमा उजुरी दर्ता गराएका छन् ।

थापाले एन्फाका महासचिव राईले आफूविरुद्ध एक अन्तर्वार्तामा झुठा र तथ्यहिन आरोप लगाएको बताउँदै आत्मालोचनाका निम्ति अनुरोध गर्दा बेवास्ता गरेको कारण आफू कानुनी उपचारमा लागेको जनाएका हुन् ।

राईविरुद्ध भोटाहिटीस्थित नेपाल प्रहरीको साइबर ब्युरोमा उजुरी दिएका हुन् ।

उनले विज्ञप्तिमा उल्लेख गरेका छन्, “अखिल नेपाल फुटबल सघंका महासचिव किरण राईले शनिबार एक टेलिभिजन अन्तर्वार्तामा ममाथि अत्यन्तै गम्भीर आरोप लगाउनुभएको विषयमा मैले उहाँलाई ती झुठा त तथ्यहिन आरोपहरू सच्याउन र आत्मालोचना गर्न अनुरोध गर्दा पनि नसच्याएपछि बाध्य भएर म कानुनी कारबाहीको प्रक्रियामा गएको जानकारी गराउन चाहन्छु ।”

उक्त अन्तर्वार्तामा महासचिव राईले एन्फाको १७ करोड रुपैयाँ हिनामिना गरेको र पछि सम्पत्ति शुद्धीकरणको छानबिनपछि पूर्वअध्यक्ष थापाले आठ करोड रुपैयाँ एन्फाको खातामा जम्मा गरेको बताएका थिए । यसमा पूर्वअध्यक्ष थापाले आफू दोषी भए कारबाही गर्न र आरोप प्रमाणित नभए महासचिव राईले कानुनअनुसारको कारबाही भोग्नुपर्ने माग राखेका छन् ।