काठमाडौं । बेलायती प्रधानमन्त्री केयर स्टारमरले युक्रेन मुद्दामा छलफल गर्न युरोपेली देशहरू र क्यानडाका नेताहरूको महत्त्वपूर्ण बैठक बोलाएका छन् । यो बैठक आइतबार बस्दै छ ।

यस बैठकमा युक्रेनी राष्ट्रपति भ्लादिमिर जेलेन्स्कीसहित विश्व नेताहरू सहभागी हुने अपेक्षा गरिएको छ । राष्ट्रपति जेलेन्स्की हाल लन्डनमा छन् । बैठकमा सहभागी हुन अन्य देशका नेताहरू पनि लन्डन जाँदै छन् ।

बैठकमा को को सहभागी हुन्छन् ?
बैठकमा इटालीका प्रधानमन्त्री जर्जिया मेलोनी, फ्रान्सेली राष्ट्रपति इमानुएल म्याक्रोन, जर्मन चान्सलर ओलाफ स्कोल्ज र क्यानडाका प्रधानमन्त्री जस्टिन ट्रुडो सहभागी हुनेछन् ।

यी बाहेक नेदरल्यान्ड्स, डेनमार्क, नर्वे, पोल्यान्ड, स्पेन, फिनल्यान्ड, स्वीडेन, चेक गणराज्य र रोमानियाका नेताहरू पनि भाग लिनेछन् ।

यस बैठकमा टर्कीका विदेशमन्त्री पनि उपस्थित हुन सक्ने जनाइएको छ । बैठकमा भाग लिन नेटोका महासचिव मार्क रुट, युरोपेली आयोगका अध्यक्ष उर्सुला भोन डेर लेयन र युरोपेली परिषद्का अध्यक्ष एन्टोनियो कोस्टालाई पनि आमन्त्रित गरिएको छ ।

यसअघि शुक्रबार युक्रेनी राष्ट्रपति भ्लादिमिर जेलेन्स्की वासिंगटन पुगेका थिए । त्यहाँ अमेरिकी राष्ट्रपति डोनाल्ड ट्रम्प र उपराष्ट्रपति जेडी भान्ससँगको भेटवार्तामा उनीहरुबीच चर्काचर्की परेको थियो ।

ट्रम्पलाई भेटेपछि जेलेन्स्की बेलायत गएका थिए । बेलायतमा उनले राजा चार्ल्स र प्रधानमन्त्री केयर स्टारमरसँग भेट गरेका छन् ।

केयर स्टारमरले आगामी योजनाको बारेमा के भने ?
बेलायती प्रधानमन्त्रीले रूस–युक्रेन युद्ध रोक्ने योजनाको बारेमा कुरा गरेका छन् ।

उनले यसबारे जेलेन्स्की, ट्रम्प, म्याक्रोनसँग छलफल गरेका थिए । फ्रान्स र सम्भवतः एक वा दुई थप देशहरूले युद्ध रोक्ने योजनामा मिलेर काम गर्ने कुरामा सहमति जनाएका छन् । यसपछि यो योजना अमेरिकासँग छलफल गरिनेछ । “मलाई लाग्छ हामीले सही दिशामा कदम चालेका छौँ,” उनले भने । बीबीसी