विराटनगर । नेपाल कम्युनिस्ट पार्टी (एमाले)को जारी दशौँ मोरङ जिल्ला अधिवेशनअन्तर्गत बन्दसत्र सुरु भएको छ । विराटनगरमा जारी अधिवेशनमा प्रतिवेदनमाथिको छलफल सकिएसँगै निर्वाचनको प्रक्रिया सुरु हुनेछ ।  

ढिलोमा आज साँझसम्ममा निर्वाचन कार्यतालिका प्रकाशन आरम्भ हुने अध्यक्ष मण्डलले जनाएको छ । सबै प्रक्रिया पूरा भए पर्सि मंगलबार निर्वाचन हुनेछ । तर, प्रतिवेदनमाथि छलफल सुरु हुनुअगावै उमेदवारी घोषणा गरेका नेता र तिनका कार्यकर्ता मत माग्न व्यस्त देखिएका छन् । जिल्ला नेतृत्वमा पुग्न पार्टीको संस्थापन र इतर दुवै समूह प्यानल बनाएर चुनावी दौडमा होमिने दौडमा छन् ।

संस्थापन(केपी ओली) पक्षबाट राजकुमार ओझा र इतर समूह (विद्योदवी भण्डारी समूह)का अजम्बर राईले अध्यक्ष पदमा दाबेदारी पेस गरेका छन् । अधिवेशन स्थलमा मतदातासँग भलाकुसारी गर्दै गर्दा भेटिएका ओझाले आफू नै पार्टीको आधिकारिक उमेदवार भएको दाबी गर्दै भने, “पार्टीले आधिकारिक रूपमा मलाई नै अध्यक्षमा अघि सार्ने निर्णय भएको छ । म सोहीअनुरूप तयारीमा लागेको छु । मतदातासँग छलफल गरिरहेको छु । मत माग्दै छु ।” 

ओझाले अध्यक्षसहित अन्य पदमा आफ्नो प्यानल तयार भएको बताउँदै मन मिल्ने साथीहरू एक ठाउँमा उभिएको बताए । ओझा प्यानलमा उपाध्यक्ष शान्तिकुमारी लिम्बू, सचिव रविन थापा, उप–सचिव एर्जालाल राजवंशी र एउटा पदमा नाम टुंगिन बाँझी रहेको सुनाए । 

अध्यक्षका अर्का प्रतिस्पर्धी अजम्बर राईले आन्तरिक प्रतिस्पर्धा पार्टीभित्र हुने र त्यो निर्वाचनको प्रक्रिया नै भएको बताए । “२०४८ सालमा चौथो जिल्ला सम्मेलन भएको थियो । संगठित सदस्य पुराना भएपछि संगठित सदस्यले सम्मेलन गर्ने चलन थियो । अहिले सदस्यबाट निर्वाचित भएर अधिवेशन गर्न थालियो । म त्यसबेलादेखि नै प्रतिनिधि हुँदै आएको छु, अब अध्यक्षमा मेरो दाबेदारी हो,” उनले भने । 

सहमति गर्दा मात्र सर्वसम्मत हुने नत्र चुनावी प्रक्रियामा जाने बताएका राईले आन्तरिक निर्वाचन गर्नु लोकतान्त्रिक प्रक्रिया भएको सुनाए । भने,“निर्वाचनबाट नेतृत्व चयन हुनेछ । आन्तरिक चुनाव हुनु राम्रो हो । सहमतिको म विरोधी होइन । मिल्दोजुल्दो नाम आए मानेर जान्छु तर त्यो नाम आएको छैन । सहमति गरौँ भनेर कुनै नेताले मलाई भन्नुभएको छैन ।” 

कोही उभिँदा मात्र आफसेआफ प्यानल खडा हुने र जनवाद कायम गर्ने ठाउँमा गर्नै नहुने भन्ने नहुने उनले बताए । प्रतिनिधि धेरै छन् तर पद थोरै भएकाले मिलाउन केही समस्या भएको बताए । 

अहिलेसम्मको आधिकारिक वा अनाधिकारिक भन्ने नभएको तर जसले यसरी प्रचार गरे पनि त्यो गलत भएको उनले टिप्पणी गरे । पार्टीभित्रको अधिवेशनमा आफ्नो मत राख्न पाइँदैन भन्ने नहुने भन्दै उनले अर्को पार्टीमा संसदीय मोर्चामा जाँदा मात्र यो पार्टीको आधिकारिक भन्ने हुने बताए । “कि उमेदवार बन्न पाउँदैनस भन्ने हुन्छ र ? जसले जित्छ त्यो र हार्ने पनि पार्टीकै आधिकारिक हुन्छ,” उनले भने । 

राईको प्यानलमा उपाध्यक्ष सागर थापा, सचिव सोम थापा, उप–सचिवमा उषा झा र सन्तोष बान्तवा छन् । 

ओलीले अध्यक्ष र उपाध्यक्षको नाम पठाए !

एमाले केपी ओलीले मोरङ जिल्ला अध्यक्षमा ओझा र उपाध्यक्षमा विराटनगर महानगरपालिकाकी उप–मेयर शिल्पा कार्कीको नाम नेतृत्वलाई टेलिफोन गरेर पठाएपछि सर्वसम्मति हुने वा नहुने भन्नेमा अन्योल देखिएको छ । 

एक नेताका अनुसार ओलीले जिल्ला तहका नेतृत्वलाई आफूले दिएको नामअनुसार नै अघि बढ्न भनेपछि इतर समूहले त्यसप्रति असन्तोष जनाएको छ । कार्कीले निर्वाचनमा उठ्न अनिच्छा देखाउँदादेखाउँदै अध्यक्षबाट नाम आएको उनले बताए । 

उनले भने,“सहमति हुन नसके निर्वाचन नै उत्तम विकल्प हो ।” ओलीले चाहेअनुरूप नहुँदा कोसी प्रदेशका तीनवटा जिल्लामा निर्वाचन भएको थियो । अन्यत्र जिल्ला अधिवेशन सकिए पनि मोरङमा ढिलो भएको हो । इतर समूहको वचस्व देखिने भएपछि मोरङको जिल्ला अधिवेशन केही पर धकेलिएको थियो । 

निर्वाचनमा ९१४ जना प्रतिनिधिले मत खसाल्नेछन् । जसमध्ये १७ पालिकाका १५१ वडाबाट ६९२ जना, २३ जनवर्गीय संगठनबाट १०१ जना, विशेष क्षेत्रबाट २४ जना, दलितबाट ५१ जना र मनोनीत ४६ जना प्रतिनिधि चयन भएर आएका छन् । 

मोरङमा एमाले इतर समूह (पूर्वराष्ट्रपति विद्यादेवी भण्डारी)को नेतृत्व एमाले मोरङका पूर्वअध्यक्ष विनोद ढकालले गर्दै आएका छन् । ढकाल पहिले अध्यक्ष केपी ओलीनिकट मानिन्थे । तर, एमाले कोसीको अधिवेशनपछि फेरिएका छन् । 

उनी अध्यक्षमा ओलीनिकट खेमाका घनश्याम खतिवडासँग पराजित बनेका थिए । अहिले उनी भण्डारी खेमामा छन् । दुवै खेमाले चुनाव नै हुँदासमेत आफ्नो बहुमत आउने दाबी गर्दै आएका छन् । 

तर, अन्य धेरै जिल्लामा सर्वसम्मत नेतृत्व चयन भएकोले मोरङमा पनि त्यही प्रयास हुने बताइएको छ । विसं ०५० यता मोरङ एमालेमा ओली पक्षको नेतृत्व रहँदै आएको छ ।

एमाले जिल्ला अधिवेशन उद्घाटन शनिबार पार्टी उपाध्यक्ष रामबहादुर थापा बादलले गरेका थिए । त्यसक्रममा सहभागी नेताहरूले सहमतिमै नेतृत्व छान्न निर्देशन दिएका थिए ।