काठमाडौं । स्वास्थ्य तथा जनसंख्या मन्त्रालयका सचिव डा. रोशन पोेख्रेल आइतबारदेखि सेवाबाट बिदा भएका छन् । उनीसँगै अतिरिक्त सचिव डा. दीपेन्द्ररमण सिंह पनि आजैबाट बिदाइ भएका छन् ।

उनीहरू उमेरहदका कारण सेवाबाट अवकाश भएका हुन् । डा. पोखरेल २०७८ साउन ४ गते सचिवमा नियुक्त भएका थिए । डा. सिंह २०७९ साउनमा अतिरिक्त सचिव नियुक्त भएका थिए ।

दुई सचिवको व्यवस्था रहेको स्वास्थ्य मन्त्रालयमा स्वास्थ्य सचिवका निम्ति तीनजना अतिरिक्त सचिव प्रतिस्पर्धामा छन् । १२औँ तहका डा. विकास देवकोटा, डा. संगिता कौशल मिश्रा र डा. टंक बराकोटी सचिवको दौडमा छन् ।

नेपाल स्वास्थ्य सेवा ऐन, २०५३ अनुसार १२औँ तहका अतिरिक्त सचिव वा ११औँ तहमा पाँच वर्ष काम गरेका कर्मचारीमध्येबाट ज्येष्ठता र कार्यसम्पादन मूल्यांकनका आधारमा सचिव नियुक्त हुने व्यवस्था छ ।