काठमाडौं । काठमाडौं महानगरपालिकाले सम्पदा मार्ग र गल्लीमा ढुंगा बिछ्याउने कामका लागि झन्डै २८ करोड रुपैयाँ खर्च गर्ने भएको छ । सार्वजनिक निर्माण विभागले चालु आर्थिक वर्षभित्र ३२ हजार ८५१ वर्गमिटर क्षेत्रफलमा ढुंगा बिछ्याउन २८ करोड १५ लाख रुपैयाँ खर्च गर्न लागेको हो ।

सुरुमा २९ करोड ४७ लाख ८८ हजार ८५९ रुपैयाँ लागत अनुमान गरिएको थियो । तर, सार्वजनिक खरिद प्रक्रियाबाट २८ करोड १४ लाख ९२ हजार ४२७ रुपैयाँमा काम सक्ने गरी निर्माण पक्षसँग सम्झौता भएको महानगरले जनाएको छ ।

महानगरका अनुसार, वडा नम्बर ६, ८, १२, २१, २६ र २७ गरी ६ वडा र हनुमान ढोका दरबार संरक्षण क्षेत्रमा ढुंगा बिछ्याउने काम सुरु भइसकेको छ ।

सार्वजनिक खरिद प्रक्रियाबाट सातवटा प्याकेजमा आठवटा योजना कार्यान्वयन ल्याइएकामा पाँचवटा योजना सम्पन्न भइसकेको छ ।

सम्पन्न पाँचवटा योजनावाट १० हजार ७२९ वर्गमिटर क्षेत्रमा ढुंगा बिछ्याइसकिएको छ । यसअन्तर्गत, वडा नम्बर ८ को जयबागेश्वरी मार्ग सिफल सेतो ढोकादेखि जयबागेश्वरी चोकसम्मको एक हजार ४८५ वर्गमिटर मार्गको काम सकिएको छ ।

यसको लागत एक करोड २६ लाख ६० हजार रुपैयाँ छुट्याइएको छ । वडा नम्बर १२ को ह्युमत खोल्सापाखा, ह्युमतदेखि लगनसम्मको एक हजार ८२५ वर्गमिटर मार्गमा ढुंगा बिछ्याइसकिएको छ । यसको लागत एक करोड ५४ लाख ६८ हजार ८०० रुपैयाँ छ ।

वडा नम्बर २१ को लगन चोकमा दुई हजार ९२ वर्गमिटर क्षेत्रको काम सकिएको छ । यसको लागत एक करोड ३६ लाख २९ हजार ७२७ रुपैयाँ छ ।

वडा नम्बर २६ को कुमारीकृपा मार्गको एक हजार १७ वर्गमिटर क्षेत्र र वडा नम्बर ६ को रामहिटी मार्गमा ५२० वर्गमिटर क्षेत्रको काम सम्पन्न भएको छ । यी दुईवटा सडकलाई एउटै प्याकेजमा काम गरिएको हो । यसको लागत ४४ लाख ८७ हजार ६०० रुपैयाँ छ ।  

सम्पन्न योजनाका लागि महानगरपालिकाले अहिलेसम्म चार करोड ६२ लाख ४६ हजार ६८७ रुपैयाँ भुक्तानी गरिसकेको छ ।

जमलदेखि असन हुँदै इन्द्रचोकसम्मको ढुंगा छाप्ने काममा कमलाछी क्षेत्रमा काम सम्पन्न भएको छ । भोटाहिटी असन हुँदै इन्द्रचोकसम्मको निर्माण काम भइरहेको छ ।

असनदेखि वीर अस्पताल, महाबौद्ध हुँदै चित्तधर मार्ग र हनुमान ढोका दरबार क्षेत्रमा विद्युत् भूमिगत गर्ने कार्यसँग समन्वय भइरहेको छ । बिजुलीको तार भूमिगत गरेपछि ढुंगा बिछ्याउने काम सञ्चालन गरिनेछ ।

सम्पदा क्षेत्रको मौलिकता संरक्षण गर्ने, सहरी सुन्दरता अभिवृद्धि गर्ने, पैदलयात्रीको यात्रा सहज बनाउने उद्देश्यसहित सम्पदा क्षेत्र, पैदल मार्ग, भित्री सडक तथा गल्लीमा ढुंगा बिछ्याउने काम भइरहेको महानगरले जनाएको छ ।