काठमाडौं । पोर्चुगिज क्लब पोर्टोविरुद्ध दोस्रो लेगमा ३–२ को  जित निकाल्दै इटालियन क्लब रोमा यूईएफए युरोपा लिगको नकआउट चरणमा प्रवेश गरेको छ । रोमाले पोर्टोविरुद्ध समग्रमा ४–३ को जित निकालेको हो ।

बिहीबार घरेलु मैदान स्टाडियो ओलिम्पिकोमा रोमालाई जित दिलाउन पाउलो डिबालाले दुई गोल गरे । यस्तै, निकोलो पिसिलीले एक गोल थपे । पोर्टोबाट सामु अघेहोवाले एक गोल गरेका थिए । पोर्टोले अर्को एक गोल भने आत्मघाति उपहार पाएको थियो । 

खेलको २७औँ मिनेटमा अघेहोवाको गोलमा घरेलु टिमविरुद्ध पोर्टोले अग्रता बनाएको थियो । तर, यो अग्रता लामो समयसम्म टिक्न सकेन । 

३५औँ मिनेटमा डिबालाले गोल गर्दै घरेलु टिमलाई खेलमा फर्काए । त्यसको चार मिनेटपछि डिबालाले दोस्रो गोल गरेपछि रोमाले पहिलो हाफमा २–१ को अग्रता बनाएको थियो । 

५१औँ मिनेटमा स्टेफन युस्टाक्युले रातो कार्डको दर्शन गर्दै मैदान छाडेपछि पोर्टो १० खेलाडीमा समेटिएको थियो । 

८३औँ मिनेटमा पिसिलीको गोलमा रोमाले अग्रतालाई ३–१ मा पुर्यायो । इन्जुरी समयमा रोमाका डेभ्यान रेन्स्चबाट आत्मघाति गोल उपहार पाएपछि पोर्टोले ३–२ को रोमाञ्चक स्थिति बनाएको थियो । तर, यसपछि थप गोल नहुँदा रोमा अन्तिम–१६ मा प्रवेश गरेको हो । यसअघि पहिलो लेगमा रोमा र पोर्टोले १–१ को बराबरी खेलेका थिए ।