काठमाडौं । भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा भएको नेपाली छात्राको मृत्यु विषय ओडिसा विधानसभामा प्रवेश गरेको छ ।

ओडिसा विधानसभाको मंगलबारको बैठकको शून्य समयमा बोल्ने सांसदहरूले केआईआईटीको गर्ल्स होस्टेलमा फेब्रुुअरी १६ मा मृत अवस्थामा भेटिएकी नेपाली छात्रा प्रकृति लम्सालको विषय उठाएका हुन् ।

शून्य समयमा बोल्दै भारतीय कंग्रेसका सांसद ताराप्रसाद बहिनीपतिले केआईआईटी विश्वविद्यालयमा नेपाली छात्राको मृत्यु भएकोमा चिन्ता व्यक्त गरेका थिए ।

उनले नेपाल र ओडिसाबीचको ऐतिहासिक सम्बन्धलाई जोड दिँदै घटनाको न्यायिक अनुसन्धानको माग समेत गरेका थिए ।

बहिनीपतिले नेपाली बालिकाको आत्महत्याबाट मृत्यु भएको आशंका गरिएको घटना र नेपालका धेरै विद्यार्थीहरूमाथि केआईआईटी कर्मचारीहरूले आक्रमण गरेको आरोप लगाइएको घटनाको न्यायिक अनुसन्धानको माग गरेका थिए ।

केआईआईटीका कारण ओडिसा अहिले लज्जित हुनुपरेको उनले बताएका थिए । उनले नेपाल र ओडिसाको सांस्कृतिक सम्बधको उल्लेख गर्दै भगवान जगन्नाथको कस्तुरी नेपालबाट आएको जनाए ।

“नेपालका विद्यार्थीहरूलाई ओडिसामा दुर्व्यवहार गरिएको पाउँदा हामीलाई दुःख लाग्छ । हाम्रो राज्यको नेपालसँग लामो समयदेखिको सम्बन्ध छ । केआईआईटी अधिकारीहरूले गरेको व्यवहारले ओडिसाको नेपालसँगको सम्बन्धमा तनाव उत्पन्न भएको छ,” बहिनीपतिले भने ।

कांग्रेसका सांसदहरूले यदि मुख्यमन्त्रीले घटनाको न्यायिक अनुसन्धानको आदेश नदिएमा विधानसभामा धर्ना दिने धम्की पनि दिएका छन् ।

शून्य समयमा बिजु जनता दल (बीजेडी)का सांसद पीके देबले पनि नेपाली छात्राको मृत्यु र त्यसपछिको घटनाले राज्यलाई लज्जित बनाएको बताएका थिए । “घटनाले अन्तर्राष्ट्रियस्तरमा ओडिसाको नामलाई बदनाम गरेको छ,” देबले भनेका थिए ।

उक्त घटना राज्यमा भारतीय जनता पार्टीको शासनकालमा बिग्रँदै गएको कानुनी व्यवस्थाको अवस्थाको परिणाम भएको उनले बताए ।

भारतीय कंग्रेसका सांसद रामचन्द्र कदमले नेपालका विद्यार्थीहरूमाथि भएको दुर्व्यवहारप्रति चिन्ता व्यक्त गरेका थिए । “यो दुर्भाग्यपूर्ण घटना हो र यसलाई कसैले पनि स्वीकार गर्नुहुँदैन,” कदमले भने ।

केआईआईटीको गर्ल्स होस्टेलमा आइतबार (फेव्रुअरी १६) बी.टेक तेस्रो वर्षमा अध्ययनरत २० वर्षीया नेपाली छात्रा प्रकृति लम्साल मृत अवस्थामा भेटिएकी थिइन् ।

विश्वविद्यालयको लापरवाहीका कारण नेपाली छात्राको मृत्यु भएको भन्दै विद्यार्थी आन्दोलित भएपछि रिजस्ट्रारको कार्यालयले एक सूचना प्रकाशित गरी नेपाली विद्यार्थीलाई तत्काल क्याम्पस खाली गर्न भनेको थियो ।

त्यसपछि सोमबार दिउँसो केआईआईटी विश्वविद्यालयमा अध्ययनरत ५ सयभन्दा बढी नेपाली विद्यार्थीलाई होस्टेलबाट जर्बजस्ती उठाएर विभिन्न रेल स्टेसनमा लगि छोडिएको थियो र उनीहरूलाई त्यहाँबाट आफ्नो घर जान भनिएको थियो ।

सोही विश्वविद्यालयका तेस्रो वर्षका मेकानिकल इन्जिनियरिङका एक पुरुष विद्यार्थी साथीले दुर्व्यवहार गरेपछि उनले आत्महत्या गरेको आशंका गरिएको छ ।

गत महिना विश्वविद्यालयको अन्तर्राष्ट्रिय सम्बन्ध कार्यालय (आईआरओ)लाई प्रकृतिले आफूमाथि दुर्व्यवहार भएको रिपोर्ट गरेकी थिइन् । तर विश्वविद्यालयले कुनै कारबाही अघि नबढाएपछि प्रकृतिले आत्महत्याको बाटो रोजेको दाबी गरिएको छ ।

उक्त घटनाको भारत र नेपालमा व्यापक आलोचना भएपछि विश्वविद्यालय प्रशासनले सोमबार एक विज्ञप्ति जारी गर्दै नेपाली विद्यार्थीलाई होस्टलमा फर्कन आग्रह गरेको थियो ।

भारतको ओडिसास्थित केआईआईटी विश्वविद्यालयले मंगलबार एक सूचना जारी गर्दै नेपाली विद्यार्थीमाथि दुर्व्यवहार गर्ने दुई सुरक्षा कर्मचारी, दुई होस्टेल र एक प्रशासन अधिकारीलाई कारबाही गरेको जनाएको छ ।

केआईआईटीले आफ्ना दुई सुरक्षा कर्मचारीलाई बर्खास्त, दुई होस्टेल अधिकारीलाई र एक प्रशासन अधिकारीलाई निलम्बन गरिएको जनाएको छ ।

क्याम्पसका कर्मचारीहरू नेपाली विद्यार्थीलाई सकेसम्म छिटो क्याम्पसमा फर्काउन सक्रिय भएर लागिरहेको जनाइएको छ । यसैबीच केआईआईटीका उपकुलपतिले पनि मंगलबार एक क्षमायाचना पत्र जारी गर्दै नेपाली विद्यार्थीसँग माफी मागेका छन् ।