काठमाडौं । चिनियाँ राष्ट्रपति सी चिनफिङले सोमबार देशको प्रविधि क्षेत्रका प्रमुख व्यापारीहरूसँग भेट गरेका छन् । बेइजिङमा आयोजित उक्त कार्यक्रममा इकमर्स कम्पनी अलिबाबाका संस्थापक ज्याक मा पनि सहभागी भएका छन् ।

पछिल्ला वर्षहरूमा चीनले ठूला व्यापारीमाथि क्र्याकडाउन गरेको थियो । तर, अहिले अमेरिकासँग व्यापारिक टकराब बढेका बेला सीले नै व्यापारीहरूसँग भेटघाट गरेका हुन् ।

ज्याक माबाहेक भेटमा हुवावेका संस्थापक रेन झेङफेई, बीवाईडीका सीईओ वाङ चुआनफु, सीएटीएलका सीईओ जेङ युकुन, टेन्सेन्टका सीईओ पोनी मा, मेइटुआनका सीईओ वाङ जिङ, शाओमीका सीईओ लेई जुन र डीपसिकका सीईओ लियाङ वेनफेङलगायत थिए ।

चिनियाँ सामाचार एजेन्सी सिन्ह्वाका अनुसार सीले व्यापारीहरूलाई उनीहरूसँग अपार र अपेक्षाकृत सम्भावना रहेको भनेका थिए । उनले देशको आर्थिक चुनौती अस्थायी भएको र निष्पक्ष बजार प्रतिस्पर्धामा अवरोधहरू हटाउने प्रतिवद्धता व्यक्त गरेका छन् ।

“निजी उद्यमहरू र उद्यमीहरूलाई फस्टाउन अहिले उत्तम समय हो,” सीले ग्रेट हल अफ द पिपलमा भएको भेटमा भने ।

चिनियाँ स्टार्टअप डिपसिकले पछिल्लोपटक अमेरिकी एआई उद्योगलाई चुनौती दिएका बेला सीले उनीहरूसँग भेट गरेका हुन् । यसलाई सकारात्मक र महत्वपूर्णरूपमा हेरिएको छ ।