काठमाडौं । चलचित्र ‘भूठान’को मोसन पोस्टर सार्वजनिक भएको छ । मोसन पोस्टरमा चलचित्रका मुख्य कलाकार हरिवंश आचार्य फिचर्ड छन् । 

हरिवंशको स्वरमा हरेक मान्छेले आफ्नै जिन्दगीमा भोग्ने फरक–फरक भोगाइ न्यारेसन गरिएको छ । 

“कहिले छोरो भएँ, कहिले बाउ भएँ । कहिले ऋणी भएँ, कहिले साउ भएँ । कहिले ताली पाएँ, कहिले गाली खाएँ । कहिले भरी भएँ, कहिले खाली भएँ । कहिले सोझो भएँ, कहिले जाली भएँ,” हरिवंशले दर्द र बेदना मिसिएको स्वरमा एउटै मान्छेले एउटै जिन्दगीमा भोग्ने जिन्दगीका फरकफरक आयामलाई प्रस्तुत गरेका छन्, “यसपाला त म के भएँ भएँ ! आम के म फेरि जन्मन्छु ?” 

एउटै मान्छेले जिन्दगीमा फरकफरक भूमिका निर्वाह गर्नुपर्ने बाध्यता र उक्त भूमिका निर्वाहका क्रममा हुने उतारचढाव मोसन पोस्टरले सिनेमामा रहेको संकेत गरेको छ । 

धिमा गतिमा चलिरहेको रेलले सुस्त जिन्दगीको संकेत गरेको छ । आकासमा उडिरहेका चराले बन्धनमुक्त जिन्दगीको चाहको संकेत गर्छ । यसलाई रमिता हेर्ने मानवीय प्रवृत्तिको पनि अर्थ लगाउन सकिन्छ । 

“यो चलचित्र हरिवंश दाइ अहिलेसम्म नदेखिएको फरक अवतार र भूमिकामा हुनुहुन्छ,” निर्देशक विनोद पौडेल बाह्रखरीसँग भन्छन्, “सिनेमामा उहाँको रिवर्न पनि हो । सिनेमा हेर्दा हरिवंश दाइको क्यारेक्टरलाई दिएर दर्शक साँच्चै छक्क पर्नुहुनेछ ।” 

विनोद पौडेलले निर्देशन गरेको चलचित्रमा हरिवंशसहित दयाहाङ राई, अनुराधा मजुमदार, पूजा चन्द–लामा, रिचा घिमिरे, जोएस पाण्डे, अदिति प्याकुरेल र टम क्रेनले मुख्य भूमिका निर्वाह गरेका छन् । यसमा हलिउडका प्रसिद्ध अभिनेता ब्रुस डर्नले विशेष भूमिका रहेको छ ।

ठकुराठी ब्रोज, भ्याकेन्ट लाईट, एभरेष्ट ईन्टरटेनमेन्ट अमेरिकाको सहकार्यमा नेपालको अवेकन प्रोडक्सन् र अमेरिकाको म्याड मंकी फिल्मसले निर्माण गरेको चलचित्रका प्रमुख निर्माता राजेन्द्र ठकुराठी, अमिताव जोशी, अविरल थापा, सुशांक मैनाली र किर्तना बाँस्कोटा हुन् । यस सिनेमाको सह–निर्माताहरूमा जोयस पाण्डे, प्रदीप शर्मा (बडाईं) र नवराज पराजुली रहेका छन् ।

चलचित्र ‘भूठान’ भुटानदेखि भारत, नेपाल हुँदै अमेरिका पुगेका भुटानी समुदायको संघर्ष, देशप्रेम र आफ्ना जरा खोज्ने यात्राको भावपूर्ण कथा प्रस्तुत गर्दछ । चलचित्रको सम्पूर्ण छायांकन केही महिनाअघि अमेरिकामा सम्पन्न भएको हो ।

चलचित्रका प्राविधिक टोलीमा छायांकन सुसन प्रजापतिको, सम्पादन अन्जय खड्काको, ध्वनि डिकेश खड्गी शाहीको, कास्टिङ सूर्य शाहीको र पब्लिसिटी डिजाइन उज्जवल श्रेष्ठको रहेको छ ।

यो चलचित्रलाई बलिउड र हलिउडकै वितरकको सहकार्यमा विश्वभर एकसाथ प्रदर्शन गर्न प्रयास भइरहेको छ । नेपालमा रोहित कट्टेल र रत्न श्रेष्ठको आरआर फिल्मसले यो चलचित्रको वितरण गर्ने भएको छ ।

निर्देशक पौडेलले यसअघि चलचित्र ‘बुलबुल’ निर्देशन गरेका थिए ।